DEN HAAG (AP) — Un corte di apelacion Hulandes a ratifica e sentencia di prizon di casi 11 aña, pa un homber condena pa termento cibernetico di decenas di muhe hoben y hombernan homosexual rond henter mundo.
E corte di apelacion di Amsterdam a confirma e sentencia maximo, di 10 aña y 8 luna, duna na march aña pasa, na e homber identifica como Aydin C., kende a keda condena pa fraude y chantahe pa e abuso cibernetico. E victimanan, algun di nan di hasta 9 aña di edad ora cu el a cuminsa ‘groom’ nan, tabata biba na Hulanda, Reino Uni, Merca, Canada, Australia y Noruega, segun corte.
E corte a bisa cu e homber ‘sin piedad’ a presiona e mucha muhenan pa realisa actonan sexual dilanti di un webcam. E tabata pretende di ta homber of muhe, y tabata persuadi su victimanan pa realisa e actonan, y despues tabata post e imagennan riba internet, of chantahea e victimanan cu e lo haci esaki.
“E muchanan muhe a sufri seriamente pa motibo di e accionnan di e sospechoso, y varios di nan ainda ta luchando cu consecuencianan psicologico serio”, e corte a bisa. Ora un homber a nenga di paga, e sospechoso a post un video di dje online, cu a resulta cu e victima a perde su trabou.
Na Canada, C., kende semper a insisti di ta inocente, lo mester presenta pa un huicio separa tocante e termento cibernetico di Amanda Todd, un mucha muhe di 15 aña di edad, kende a hala atencion mundial na 2012 pa a comete suicidio motibo di abuso riba internet.
Corte Supremo Hulandes aña pasa a aproba su extradicion pa Canada pa presenta na huicio eynan, pero no a sali na cla ki ora e lo wordo entrega na autoridadnan Canades.
