Hues a honra e peticion di Aruba Birdlife Conservation (ABC) pa para tur construccion den e area di wetland banda di The Mill Resort. Tambe a duna ordo na gobierno pa tuma medida di proteccion.

Nan a entama un caso sumario ayera. Esaki rosamento a luga na e parcela banda di The Mill Resort pa construccion di camber di hotel. Sinembargo e area aki ta cay den zona berde segun e plan di ordenansa ROP. 

Hues a dicta di biaha ayera tambe y awor Mill Resort ta prohibi pa continua cualkier construccion of otro actividadnan riba e area di wetland aki. Y gobierno di Aruba mester tuma medida (pone baricada etc.) no mas tarda cu awe 7 di maart pa preveni cu cualkier actividad di tuma luga. Un multa di 250.000 florin pa dia, cu maximo di 5 miyon florin The Mill of gobierno di Aruba mester paga si no cumpli cu esaki.

Aruba Birdlife a bati alarma ayera mainta bisando cu nan lo ta vigilando e situacion pa sigura cu ningun ‘bulldozing’ lo tuma luga tanten cu hues no tuma su decision. Nan a pidi tambe cu den caso ta necesario pa boluntarionan keda pendiente pa traha un ‘human shield’ pa preveni mas destruccion. Y sigur pa protege e neishi di shoco na e sitio. Nan a yama autoridadnan pa bin na e area y esunnan cu a presenta tabata entre otro di Departamento di Medio Ambiente (DNM). Despues di merdia cu minister di infrastructura y medio ambiente, Otmar Oduber (POR) a bini pa analisa e situacion.

ABC ta bringando diferente caso unda tereno a wordo duna pa construi riba area di naturalesa desde 2011.

Reaccion di The Mill
Bon Dia a combersa cu chief engineer di The Mill kende ta bisa cu pa 29 aña caba nan ta pagando grondbelasting y erfpacht pa e pida tereno cu awor ta den discusion. Tur impuesto ta paga tambe manera cu nan a mustra nos y esaki ta e tercer fase pa completa nan proyecto na The Mill, conectando e cu e otro banda.  E chief engineer ta bisa cu e pida tereno patras ta wetland, pues esun cu no ta rosa no ta parti di e zona berde. Te asina cu e ta na altura di dje pa tur e añanan aki, e ta bisa.

Segun nos a compronde, e pida tereno aki no ta registra riba nomber di The Mill. Pues si ta resulta cu e area tabata cay den zona berde y mester entrega e tereno bek, The Mill ta puntra si nan lo haya tur placa paga na belasting bek.