Corte di Prome Instancia: “Sevinger a bergonza y debilita gravemente e confianza den un gobierno”

Mediante un comunicado di prensa di Ministerio Publico a informa cu ayera Corte den prome instancia a condena ex-minister di Infrastructura di Aruba y actual miembro di Parlamento di Aruba Oslyn Benito Sevinger (Benny) pa un castigo di prizon parcialmente incondicional di 1 aña, di cual 6 luna ta condicional, pa corupcion y malversacion cu un tempo di prueba di 3 aña.

Hues a dicidi ademas cu Sevinger ta wordo saca for di derecho electoral y cu ta kita tur derecho di dje pa carga cualkier funcion den servicio di pais Aruba pa un duracion di cinco aña. Corte den prome instancia ta considera cu, door di laga otronan corumpi’e, Sevinger a bergonza y debilita gravemente e confianza den un gobierno cu ta actua na un manera integro.

E hecho cu e corupcion aki a bira conoci a resulta den daño grave na e imagen di pais Aruba, door di cual inversionistanan por aleha di haci inversionnan na Aruba. Sevinger ademas a usa su fundacion politico pa su mes ganashi financiero, loke ta atacha e confianza di e ciudadano den politiconan.

Banda di e sospechoso Sevinger, seis otro sospechoso a wordo condena pa castigonan parcialmente incondicional:

E sospechoso P.T.A.S, ken tabata ambtenaar di DOW, a wordo condena pa un castigo di prizon di 2 aña, di cual 1 aña ta condicional, pa corupcion activo di e ex-minister y labamento di placa.

Corte a pone un condicion particular riba e sospechoso aki y esey ta cu pa un periodo di 3 aña, e no por aplica of obtene opcionnan di derecho di erfpacht comercial bao su mes nomber of bao cualkier otro nomber.

Hues a dicidi tambe cu e suma di placa di 1.3 miyon dollar cu a wordo confisca na un banco na Corsou y cu ta procedente di corupcion activo, ta keda confisca. E sospechosonan M.L.A., C.R.M., E.R.W y N.D.N. a wordo condena pa estafa di pais Aruba pa castigonan di prizon di 24 luna, di cual 12 luna ta condicional, y un tempo di prueba di 3 aña durante cual nan no por pidi of obtene opcionnan riba derecho di erfpacht comercial bao ningun nomber.

Ademas hues a condena e sospechoso M.L.A. pa paga un multa di 50.000 florin y e sospechosonan C.R.M., E.R.W y N.D.N pa multanan di 25.000 florin.

E sospechoso H. a wordo condena pa un castigo di trabao pa comunidad di 80 ora y un multa di 15.000 florin pa corupcion di e ex-minister. E otro cinco sospechosonan a wordo declara liber.