Corte di prome instancia a dicta sentencia contra Alberto Groeneveldt pa caso di cacho Khaleesi

Ayera mainta a tuma luga na corte di prome instancia e caso contra Alberto Groeneveldt, ken tabata acusa y a keda sentencia pa negligencia intencional di bestia cu 60 ora di trabao comunitario, unda 20 di nan ta condicional y 750 florin di multa.

E caso cu a cuminsa pasa di 8:40 di mainta, a conta cu presencia di varios fundacion protector y defensor di bestia, publico tambe tabata presente y Cuerpo Especial Arubano (CEA) pa asina resguarda e orden publico rond di corte.

Na comienso, Groeneveldt a señala cu e semper tabata un persona ocupa cu su trabao, y cu e parti di mas tristo ta cu e situacion aki a sucede den su cas, sin sa kico por a pasa cu Khaleesi, ken tabata su cacho y cu a muri dia 31 di maart ultimo debi na negligencia.

Groeneveldt a sigura na hues cu e ta sinti hopi tristo di loke a pasa cu su cacho y cu semper e tabata stima bestia. Ora hues a puntra si tabata normal cu e cacho tabata mara na cadena, Groeneveldt a bisa cu normalmente su cachonan tabata los y cu e no tabata mara nan cu cadena. Despues cu e incidente a pasa el a haya sa cu un hende di su cas a marele. Groeneveldt a keda insisti cu maske cu e tabata responsable pa Khaleesi, e no sa con cos a bay robes, ni sa ken a mara cadena na nek di Khaleesi, ni tabata sa cu Khaleesi tabata den mal estado.

Den e tratamento di e caso tambe a bin dilanti cu e puppies cu fundacionnan a rescata hunto cu Khaleesi, yiunan di Khaleesi, tabata den bon estado; algo cu Luna Foundation y Crijojo Trappers a nenga mesora den un declaracion haci pafo di corte, indicando cu nan tin potretnan unda ta mustra con nan tabata den estado di desnutricion.

Durante su declaracionnan, Groeneveldt tabata mustra bon compostura y tabata papia trankil. Sinembargo, su emocionnan finalmente a mustra ora el a conta hues di e consecuencianan cu el a sufri desde cu e caso a bira conoci. El a conta con tur su contractnan a keda cancela, el a perde miembresia na diferente organisacion, y hasta a haya prohibicion di drenta algun lugar. Tambe a destaca e menasa y negatividad cu el a ricibi a traves di rednan social.

Mientras tanto, defensa di Groeneveldt, abogado Desiree Croes a sigura cu Groeneveldt no tabata negligente pasobra dos luna prome cu rescate di Khaleesi, Groeneveldt a tuma contacto cu fundacion pa pidi ayudo, ya cu e no tabata por cuida su animalnan debidamente. Sinembargo, e fundacion no por a tuma e cachonan e tempo ey ya cu nan no tabatin lugar pa pone nan. Asina mes, Croes a acusa cu “Luna Foundation ta co-culpabel pasobra nan no a bay busca e cacho” ora Groeneveldt a pidi ayudo. E ponencia aki a crea conmocion entre esnan presente den e sala.

Fiscal di Ministerio Publico a pidi como castigo 60 dia di trabao comunitario of 30 dia cera den KIA, pa motibo cu no por a proba cu Groeneveldt tabatin e intencion pa Khaleesi muri, y tambe teniendo cuenta cu esaki tabata su prome castigo. Tambe hues a bisa cu a tene cuenta cu e hecho cu Groeneveldt a sufri caba pa e consecuencianan di e morto di Khaleesi den comunidad. E sentencia di e hues pa caso aki ta 60 ora di trabao comunitario unda 20 di nan ta condicional mas 750 florin di multa.

Abogado di Groeneveldt: “Tin cosnan cu a bay robes, no cu tabatin intencion”

Ora caso a culmina, na salida di corte abogado Croes a sigura cu ta bon cu nan a logra trece nan bandi medaya den corte, “a papia di un abuso cu tabatin hopi tempo y lo cual a tuma luga ta cu e cacho tabata mara for di 21 di maart te cu 26 di maart, 5 dia, esey ta hopi importante pa nos trece dilanti pasobra den tur atencion cu el a haya no tabata duidelijk kico a pasa.” El a sigura.

Croes tambe a expresa cu “tabata importante pa Groeneveldt trece su puntonan dilanti y pa pueblo tambe sa kico a pasa pasobra ya 17 di januari ultimo meneer Groeneveldt a acerca e fundacionnan pa bin yude cu e cacho, el a haci e trabao cu e mester a haci, el a pidi nan pa bay cu e cacho y esaki no a pasa, tambe despues Polis di Bario mester a bini pa bay cu e cachonan y tampoco a pasa, na fin di dia e ta keda responsabel y e ta tuma su castigo pasobra tin cosnan cu a bay robes, no cu tabatin intencion pero e cacho a keda mara un dia y nos a kere cu door cu e cacho ta hopi nervioso, el a draai door di e cadena, anto el a haci su mes daño, pero na fin di dia ta un ser humano cu ta keda responsabel pa e cacho y p’esey tambe el a bisa den cuminsamento, cu e castigo cu lo pidi lo mi acepte aunke no tabata mi intencion, na ningun momento pensando cu mi ta bay haci algo malo pero e tabata mi cacho y a mi mester tuma e responsabilidad, esey ta lo cual a pasa awe, ” el a bisa.

Groeneveldt por a haya seis luna di castigo den prison ya cu esey tabata e sentencia maximo segun Croes a sigura, “y hues a tene cuenta cu tur e circunstancianan di cual a ser splica caba,” si den caso cu Groeneveldt ta dicidi di no cumpli cu e sentencia, e tin un castigo di prison cu ta 1 luna.

“Nos a dicidi awe di biaha cu nos no lo apela e decision di hues pa asina e caso por caba awe,” Croes a destaca.

Tambe, el a bisa cu algo cu a sali den caso aki ta cu tin hopi caso ta pasando afo unda nan a busca riba Internet “y nos a wak e Facebook di e mesun fundacion aki y nos a mira cu for di lunanan caba nan tin e mesun situacion, un cacho cu bo ta wak cu e cadena a literalmente crece den su cueyo y nos no sa ken e persona ta, toch? Un cacho cu a laga no sa cuanto ora den auto pero nos no sa ken e persona ta, dus aworaki a hiper focus riba Groeneveldt, el a bira e cara di e persona cu ta maltrata cacho siendo cu esey ta tuma luga asina hopi y p’esey mes tambe a trece dilanti y mi ta keda para riba dje si, cu meneer Groeneveldt a pidi ayudo y tin un parti di culpabilidad tambe di fundacionnan cu ora pidi ayudo pasobra bo no por mas, p’esey e fundacionnan tey nan tambe, nan ta haya sponsor cu nan por yuda hende y esaki no a tuma luga, nan por tuma mi na malo, pero si tin un persona yama fundacion y bisa mi no por mas, dos luna y un siman despues bo ta yega den cas.”