Awe mainta corte di apelación a duna sentencia den caso di e apelación cu SKOA a entama contra e veredicto di corte den prome instancia di dia 8 di juli 2015. Pa e aña escolar 2015-2016 SKOA a aumenta e pago escolar y a stipula cu pa (re)inscripción di alumnonan mayornan mester entrega comprobante di pago inicial di e suma concerni di Afl. 175,-. Tambe SKOA a stipula cu e aircogeld na tur skol cu tin airco lo ta e suma di Afl. 150,- a pesar cu no ta SKOA ta cobra e suma aki sino e skolnan mes of e comishon di mayornan concerni.
E mayornan cu a entama caso contra SKOA a nenga di paga e pago escolar y a alega cu gobierno tin obligación di paga tur gasto di enseñanza y cu SKOA lo no ta autoriza pa cobra e pago escolar. Corte di prome instancia a prohibi SKOA pa cobra e aumento di pago escolar y/ of aircogeld como tambe a prohibi SKOA pa mara condición si pago (completo of parcial) no wordo hasi. Esaki a causa un stagnacion y incertidumbre enorme den operación di SKOA pendiente e veredicto di corte di apelacion. Corte di apelación a juzga cu e esencia di e disputa entre partidonan ta e pregunta si gobierno di Aruba tin e obligación di cubri 100% di tur gasto real di enseñanza particular, cu otro palabra si enseñanza particular ta wordo subsidia completamente door di gobierno y ta gratis na Aruba.
Corte di apelación a juzga cu esaki no ta e caso. Aruba no tin (ainda) e base legal pa ofrece enseñanza gratis. Esaki ta encera cu gobierno no tin obligación di subsidia tur gasto real di enseñanza particular. SKOA como tal tin derecho di cobra pago escolar pa financia e gastonan cu gobierno no ta subsidia- y mara e condiciónnan cu ela stipula na esaki. Corte di apelación a considera tambe cu e suma cu SKOA ta cobra pa pago escolar no ta di tal magnitud cu e ta stroba e admisión di alumnonan na enseñanza, especialmente si considera e opcionnnan cu SKOA ta ofrece pa paga cu un areglo di pago y/of e posibilidad pa busca ayudo social di gobierno. Pa locual ta trata e aircogeld corte di apelación a considera cu a pesar cu esaki ta un asunto di e skolnan y/of e comishon di mayornan, SKOA tin e derecho di stipula e suma cu ta wordo cobra manera SKOA a hasi pa asegura admisión na enseñanza.
Corte di apelación ta di opinión cu e admisión na enseñanza ta suficiente garantisa considerando cu e suma di pago escolar y aircogeld hunto y e hecho cu pago di aircogeld no ta mara na e condición di (re)inscripción. Cu otro palabra, e sumanan di e pago escolar y aircogeld cu SKOA a stipula sigun corte di apelación no ta di tal magnitud cu esakinan por of ta stroba admisión na skolnan. Pues tur mucha na Aruba por sigui e enseñanza sin cu e pago escolar ta stroba esaki. E conclusión ta cu SKOA tin derecho pa cobra e pago escolar manera stipula pa aña escolar 2015- 2016 como tambe pa e aña escolar venidero manera a wordo comunica na mayornan den e cartanan di fechanan 20 di mei 2016 y 24 di mei 2016. Corte di apelación a bay di acuerdo tambe cu SKOA a hasi suficiente pa cu gobierno hasi pagonan cu tabata atrasa na SKOA.
E mensahe di SKOA pa mayornan ta keda uno di cooperación mutuo y unión pa pone e atención na unda e mester ta cu ta enseñanza. SKOA ta satisfecho cu e resultado di e veredicto aki en vista cu esaki ta trece claridad y tranquilidad pa e skolnan, maestronan y mayornan pa locual ta trata e tema aki. SKOA, maestronan y mayornan por dedica tur atención na ofrece y ricibi enseñanza di calidad den un ambiente trankilo y liber di instigacion. Den curso di e simanan venidero SKOA lo duna mayornan mas información ariba e siguiente pasonan. Pa termina SKOA ta condena categóricamente e rumornan cu su directora lo ta suspendi pa motibo di malversación di fondo como tambe e insinuación cu esaki lo tin algo di haci cu e pago escolar. Esaki ta un información completamente eroneo e incorrecto y ta wordo categoricamente desmentí.
Comunicado SKOA
