Recientemente Corte den Prome Instancia di Aruba a trata algun caso di abuso sexual. Un di e casonan lamentable aki ta trata di un meneer cu a abusa sexualmente di su stief-nietonan pa un periodo largo. Den e caso aki, Corte den Prome Instancia den su veredicto a declara e sospechoso culpable di e delitonan aki.
E veredicto ta indica cu e investigacion di e audiencia publico a tuma luga dia 27 di october 2023. E sospechoso a presenta, cu asistencia di su consehero, Sr. G.A. Maldonado, abogado na Aruba.
E autoridad fiscal, Sr. E. Stevens, a pidi tribunal, durante e sesion, pa e tribunal pronuncia e cargonan contra e sospechoso como prueba y condena e sospechoso cu un sentencia di prison di seis aña, kitando loke el a sinta caba den detencion.
Su peticion ta inclui tambe e confiscacion di e telefon celular cu a confisca for di e sospechoso, e aceptacion di e demanda di e parti perhudica y e imposicion di un medida di recurso di daño cu ta conforme cu e suma cu a keda otorga den e demanda.
E consehero a pidi pa e sospechoso wordo libera di e cargonan pasobra no tin suficiente prueba legal y consistente. E la argumenta cu e declaracionnan di e dos victima menor di edad no ta confiable pasobra nan declaracionnan ta mutuamente contradictorio den puntonan esencial.
E tribunal ta di opinion, hunto cu e fiscal y e consehero, cu no por prueba legal- y convincentemente cu tabatin penetracion sexual, particularmente ora ta trata di e acusacionnan di a bringa y mantene e penis den e vagina y anus di e muchanan. Pues pa loke ta trata e penetracion vaginal y anal cu penis, e dossiernan no ta contene prueba suficiente. E sospechoso lo ser libera pa e parti ey di e acusacion.
E tribunal si ta di opinion cu e declaracionnan di e menornan, mirando e detayenan specifico cu nan a declara, ta duna di manera autentico e experiencia cu nan a biba cu e sospechoso. E tribunal ta considera e declaracion di e menornan confiable, ya cu nan ta coincidi riba elementonan esencial y detaye. Ambos declaracion ta coincidi tocante e scenario y e manera di actuacion di e sospechoso. Na momento di trata e punto esencial di e declaracionnan, cu ta cu e sospechoso tabata esun cu a maltrata sexualmente e muchanan, e declaracionnan ta detaya y consistente.
E corte a remarca cu cambia detayenan durante un comparacion detaya di e declaracionnan, no ta afecta e confiabilidad di nan. Ambos mucha a declara na momentonan diferente, cu of sin pregunta, dilanti diferente persona, y na principio nan relato tabata coincidi tocante e maltrato sexual. Ademas, e emocion di un di e victimanan mester wordo considera como un elemento cu ta contribui na e confiabilidad di e declaracion, segun loke testigonan a reporta ora e victima tabata contando su experiencia di maltrato sexual.
Pa ambos victima menor di edad ta conta tambe cu no a sali na cla ningun motibo ni rason pa duna declaracionnan falso contra e sospechoso, ken ta nan stief-opa. No tin señal di indicacion cu e muchanan, bao pretension di terceros, a inventa nan storia.
Teniendo consideracion pa tur esaki, e tribunal no ta mira motibo pa pone den duda e credibilidad y confiabilidad di e declaracionnan di e muchanan.
Den e caso aki tin dos declaracion di dos victima, cu ya ta sostene otro riba puntonan importante, pasobra e declaracionnan aki ta coincidi na principio tocante e manera cu y unda e abuso sexual a tuma luga, manera tambe e actonan sexual observa cu e sospechoso a haci na un otro. Ademas, e declaracion di un di e victimanan ta sosteni pa declaracion di un testigo, cual ta e omo di e victimanan.
El a indica cu un dia, durante e periodo di cuido temporal, e tabata presenta na cas di oma. El a declara cu el a sorprende e sospechoso den e cushina mientras cu e sospechoso tabata ‘frega’ intimamente cu e victima.
E tribunal ta tuma nota tambe di e manera cu e ‘trabao’ constante di e sospechoso ta ser usa como medio di prueba. Den ambos caso, tin abuso di familiarnan muhe, den edad di pre-pubertad, den e camber di oma, cada biaha cu oma di e muchanan tabata ocupa cu trabao den e crèche.
Basa riba tur esaki, e tribunal ta conclui cu tin prueba suficiente, legal y convincente cu e sospechoso a haci e acto sexual cu ta carga riba dje segun e acusacion, manera ta describi den e declaracion prueba. Por conclui cu e defensa no tin fundeshi.
Na determinacion di e castigo cu ta bay impone, ta tene na cuenta e naturalesa y seriedad di kico a keda comproba, e circunstancianan bao di cual e crimen a keda cometi, e grado di cual e comportacion ta atribui na e sospechoso, y na e persona di e sospechoso, manera tur esaki a sali na cla durante e investigacion den e sesion di corte. Na e mutuo ey, e ta tuma na cuenta di e seriedad di loke a keda comproba, den relacion cu otro crimen cu poni na ley, manera cu ta refleha entre otro den e maximo legal poni riba nan y den e castigonan imponi pa e crimennan di semehante naturalesa.
E sospechoso a comete un crimen duradero di abuso sexual riba su dos stief-nieto chikito na manera cu a keda comproba. E sospechoso a impone riba e vitcimanan actonan sexual cu ta inclui penetracion den nan curpa. Door di esaki, e sospechoso a haci un violacion na integridad fisico y mental di e victimanan hoben.
Tribunal ta conta esaki duro contra e sospechoso, pasobra e sospechoso a abusa sexualmente di ambos victima den nan ambiente di cas, den cas di nan wela (tambe luga di biba di e sospechoso), caminda nan mester sinti nan mes sigur despues di scol.
Ademas, e tribunal ta tuma na cuenta e hecho cu durante e sesion di corte, e sospechoso no a mustra ningun indicacion di compronde e malo di su comportacion.
Corte a dicta sentencia y a declara e sospechoso culpabel di e delito di abuso sexual di e dos victima menor di edad y a condena e sospechoso cu seis aña di prison, kitando e tempo cu e sospechoso a sinta caba den detencion.
Mester remarca cu recientemente hopi caso di abuso sexual di menor di edad a bin pa dilanti den corte, un hecho hopi lamentable, sobre todo mirando cu apenas dialuna ultimo a celebra Dia Internacional di Derechonan di Mucha. E fenomeno aki ta uno cu lastimamente ta crece den comunidad y mester resalta cu e castigo pa e tipo di delitonan aki na Aruba ta laga hopi di desea.
E ta un hecho cu mester bin cambionan drastico den e leynan huridico pa asina por duna e castigo cu e delincuentenan cu comete e actonan semehante aki merece di berdad.
