Decision di Prome Minister Evelyn Wever Croes pa atende cu obhecion riba Secrets a habri e caminda

Three Rivers ya no mester warda sentencia di Corte di Apelacion pa por reanuda trabao riba su proyecto di hotel na Sero Colorado. Pero por spera mas caso den Corte contra e proyecto.

E siman aki, Presidente di Corte Comun di Husticia di Aruba, Corsou, St. Maarten, y di Boneiro, St. Eustatius y Saba a duna su punto di bista riba un peticion pa por duna un provision temporario. Esaki ta den luz di e caso di apelacion cu Three Rivers a entama contra e decision di Corte den Prome Instancia di dia 9 di Februari 2022 cu habitantenan di Seroe Colorado a gana. Ta trata di un caso cu ciudadano W. Werkema, representa pa mr. Maritza Boyce kendenan na Februari ultimo a entama pa para e construccion, pa motibo cu e proyecto entre otro lo no ta cumpli cu tur regla di ley.

Three Rivers tambe a inclui Minister pa Asuntonan General, Innovacion, Organisacion Publico, Infrastructura y Ordenanza Teritorial, Prome Minister Evelyn Wever-Croes den e caso.

Den su decision, Presidente di Corte Comun a splica cu Minister dia 28 di mei 2020, a duna Three Rivers un permiso di construccion pa medio di un decreto ministerial pa traha un hotel na Sero Colorado. Minister a declara pa medio di decreto di 9 di maart 2021 cu e obhecion di Werkema y Boyce contra e permiso di construccion no tabata admisibel.

Pero dia 9 di februari 2022, Corte a determina cu e apelacion di Werkema/Boyce contra e permiso di construccion tabata na su luga y como tal a destrui e decreto di 9 di maart 2021, y a duna Minister, teniendo na cuenta e decision di Corte, pa saca un decreto nobo. Banda di esey, Corte a suspende e permiso di construccion te ora cu Minister por a dicidi riba e peticion di obhecion di e Werkema y Boyce.

Ta contra e decision aki cu Minister Evelyn Wever-Croes y Three Rivers a dicidi pa apela na Hof. Y Three Rivers a pidi e Presidente pa bin cu un provision temporal, mientras tanto. Tanto Minister Wever-Croes y e ciudadanonan Werkema y Boyce a entrega nan posicion y defensa, y e compania Three Rivers y e ciudadanonan a entrega mas documento.

Presidente di Corte Comun a atende cu e peticion pa medio di un reunion digital dia 26 di april, unda Three Rivers tabata representa pa mr. Reinkemeyer y mr. Ruiz di e bufete di abogado Croes, Wever & Ruiz, y Minister Evelyn Wever-Croes tabata representa pa mr. Emerencia, di Direccion di Legislacion y Asuntonan Huridico. Mr. Boyce a representa Sr. Werkema como su abogado.

Consideracionnan

Presidente mr. Saleh a bisa den su consideracionnan cu Three Rivers tin como obhetivo pa traha un hotel na Sero Colorado y a ricibi e permiso di construccion cu a pidi na Minister Wever Croes na mei 2020. Despues di a sigui e obhecion di Werkema – cu a keda rechasa pasobra segun e Minister, e carta no a drenta den e termino di dos siman – Werkeman a apela contra e decision di Minister y a pidi Corte di Prome Instancia pa suspende e permiso di construccion pa e hotel.

Corte a entre otro a evalua cu Minister, bao e circunstancianan specifico, no por a declara cu e obhecion di Werkema tabata no admisibel. No por a spera di Werkema cu e por a formula motibonan di obhecion basa riba e unico biaha cu el a haya bista riba un proyecto di construccion asina grandi y compleho.

Corte di su banda a considera cu e apelacion ta hustifica y como tal a bari e decreto di 9 di maart for di mesa y a duna Minister e instruccion pa bolbe tuma e obhecion di Werkema na consideracion, teniendo na cuenta cu e base di e obhecion manera a entrega di 3 di februari 2021. Mas ainda, Corte a para e permiso di construccion basa riba articulo 54 di LAR, Landsverordening administratieve rechtspraak te ora cu Minister dicidi riba e obhecion.

Three Rivers den su peticion tin como obhetivo pa suspende e decision, pa asina e permiso di construccion cu a keda suspendi por haya bida atrobe y asina reanuda e construccionnan.

Di otro banda, Prome Minister Wever-Croes a usa como defensa primario cu Presidente di Corte Comun no ta autorisa pa conoce e peticion pa suspension, pasobra Lar no ta brinda e base legal. Pero Presidente a argumenta lo siguiente: Manera HOF a evalua prome caba, por ehempel den e sentencia di juni 2008, unda Corte a duna opinion riba un caso cu a keda presenta Lar. Tabata trata aki obhecion contra e hecho cu a nenga di inscribi un matrimonio entre un Arubiano y un Colombiana na Colombia, pasobra tabata traha di un matrimonio ficticio.

Hof a determina e tempo ey cu for di e sistema di Lar por saca afo cu un provision temporario ta caduca, asina cu bin decision di e tratamento di e apelacion na Hof. Mas ainda den e caso specifico aki a mustra cu aplicacion di Lar ta trece cune cu provisionnan riba suspension y provision temporario ta aplicabel den apelacion (Hoger Beroep). Esey ta nifica cu e apelacion na Hof pa un provision temporario of suspension por keda pidi den relacion cu decisionnan cu Corte ta tuma den apelacion.

Mientrastanto Presidente di Corte ta determina cu Minister, dia 6 di mei 2022 a dicidi riba e obhecion cu Werkema a entrega. Cu e decision nobo riba e obhecion, Minister por duna contenido na e decision inicial di Lar y como tal, e paro riba e permiso di construccion tambe ta cay afo. Esaki ta haci cu Three Rivers por continua cu construccion.

Lo tin mas caso

Bon Dia Aruba a tuma contacto cu mr. Maritza Boyce riba e decision di Corte Comun, y el a bisa cu mester respeta decision di Huez, aunke cu den e decision aki no a tene cuenta cu otro condicion cu e Huez administrativo a menciona den su sentencia di februari. Hecho ta cu Minister, den e caso aki, Prome Minister Evelyn Wever-Croes siman pasa a tuma decision riba e obhecion di Sr. Werkema y como tal a cumpli cu exigencia di Lar. Pero den e mesun rosea, e abogado a bisa cu no a ricibi e datonan concreto di e proyecto. “Ta keda e hecho cu locual nos ta mira cu ta trahando no ta locual ta skirbi den e permiso di construccion. Awor mester reuni pa considera e siguiente paso.”

No ta exclui cu ta sigui cu e lucha huridico pasobra te ainda e habitantenan no tin claridad, cu excepcion di e hecho cu a duna permiso pa construccion di un hotel di 600 plus 300 camber, cu ta 900 camber en total. Y e argumento di e Ley di Ordenanza Teritorial cu regla, e ROPV no a cambia. E tereno manera ROPV ta indica ta permiti unicamente un proyecto di maximalmente 600 camber.

E decision di Prome Minister Evelyn Wever-Croes pa evalua e obhecion di Werkema como tal a yuda Three Rivers den su caso, pero e falta di claridad riba henter e proyecto ta nifica cu e lucha legal lo sigui. “Nos no ta contra desaroyo. Y nos a purba sinta cu Three Rivers y tambe cu Minister, pero no a haya ningun oido,” Boyce a bisa. E speransa tabata pa yega na un claridad y determina con pa sigui dilanti unda tur partido ta satisfecho. Pero mirando cu esaki no a sucede, no ta exclui cu ta bay sigui apela e decision di duna permiso di construccion cu ta contra ley.