Diabierna 17 di november 2023 Corte Comun di Husticia di Aruba, Corsou, Sint Maarten y di Boneiro, Sint Eustatius y Saba a habri oficialmente su di cinco filial, na Sint Eustatius.
Presidente di Corte Comun di Husticia, mr. De Kort: ‘Ta un deseo personal cu mi a anhela hopi tempo pa por a haci realidad, mescos pa mi coleganan di Corte, pa habri un filial na Sint Eustatius. Te cu ultimo casonan tabata ser trata den e sala caminda tabata tene reunionnan di conseho insular den Guesthouse di Sint Eustatius. Den e ultimo añanan a bini basta peticion di gobierno local y di pueblo di Sint Eustatius na mi persona pa haci corte mas presente riba e islanan mas chikito. Den un bon colaboracion cu Ministerio Hulandes di Husticia & Siguridad, mescos cu Ministerio Hulandes di Asuntonan Interno y Relacionnan den Reino mi ta contento cu awe nos ta habri e portanan di nos propio filial di Corte na Sint Eustatius. Tambe nos lo tin un propio bali y nos por ofrece e habitantenan di Sint Eustatius un miho acceso na husticia.’
E edificio cu ta keda na Kerkweg 6 a ser construi na aña 1795 y ta conoce un historia rico. Desde awor e casonan lo tuma luga den e edificio historico aki y e griffie no solamente ta disponibel ora cu e hues ta bula for di Sint Maarten. Pa cuminsa, dos biaha pa siman lo tin un griffiemedewerker pa informa e habitantenan y pa tuma documentonan.
Informacion tocante orarionan di apertura ta ser anuncia despues.
Prome cu e apertura oficial di dia 17 di november 2023 Corte a keda honra cu bishitanan di Gobernador di Sint Maarten, mr. Baly, Comisario di Rey di Friesland drs. Brok, miembronan di parlamento di Sint Maarten, Sekretario di Estado di Relacionnan den Reino, sra.drs. Van Huffelen. Tambe e mainta ey a tuma luga e prome caso den corte.
