Ayera mainta durante un conferencia di prensa Corte Comun di Husticia di Aruba, Corsou, Sint Maarten, y Boneiro, Sint Eustatius y Saba a presenta su rapport anual y cuenta anual. E tema di e rapport anual, cual e aña aki ta “Extranea lux, illuminatio interna” (Bista di pafo, Inspiracion pa paden), ta enfatisa e rol di e Corte Comun den sociedad.
Presidente di Corte Comun di Husticia, sr. Mauritsz de Kort, hunto cu sr. Martin Luttge, Director di Maneho di Empresa, a haci introduccion oficial di e rapport y cuenta anual, a traves di un video. Na Aruba, vice-presidente Jacques Keltjens a elabora ariba e aspectonan relevante pa Aruba.
Durante e conferencia, sr. Keltjens a menciona cu esaki lo ta su ultimo aña como vice-presidente na di e Corte Comun di Husticia na Aruba ya cu su periodo di cinco aña ta vence e aña aki.
E rapport anual ta ofrece un resumen di e desaroyonan den e proceso primario y e maneho di Hof. Apart di esaki, e ta contene entevistanan cu ta relaciona cu e tema y ta duna un bista riba e influencia externo cu ta inspira internamente.
Pa loke ta trata Aruba durante e conferencia di prensa a resalta entre otro e casonan y decisionnan intersante cu a tuma luga durante aña 2023. A menciona entre otro e casonan di Secrets Hotel, caso di Vacuna Gate, caso di Aruba Bank contra ex minister Otmar Oduber, un caso di belasting rector, na unda pa prome biaha a haci pregunta na Hoge Raad tocante e caso aki, tambe e caso di apertura di matrimonio pa parehanan di mesun sexo y tambe caso Avestruz.
E cuenta anual ta trece dilanti tambe cifra di casonan, si tin aumento of si tin caida den cierto tipo di caso, specificamente pa Aruba. Un categoria di cason cu a wordo remarca ta e aumento di casonan cu ta relaciona na crimen di trafico. Den esaki a resalta cu na Aruba tin e cantidad di crimen di trafico mas halto compara cu e otro islanan.
Por lesa mas detaye di e rapport y cuenta anual di e Corte Comun di Husticia di Aruba, Corsou, Sint Maarten, y Boneiro, Sint Eustatius y Saba den nos edicion di Bon Dia Aruba di diamars 16 di juli.
