Diaranson 18 di mei Corte Comun di Husticia di Aruba, Corsow, Sint Maarten y di Boneiro, Sint Eustatius y Saba a presenta su relato anual di 2015. Presidente di Corte Comun mr. Evert Jan van de Poel hunto cu vicepresidente mr. Eunice Saleh y director interino di ‘bedrijfsvoering’ Nadine Calister-Presentacion MSc. a presenta e relato anual. Tema di e relato ta ‘Aceleracion’. E tema ta accentua door di e “tandwielen” cu a uza como elemento di imagen den e relato anual y cu tambe ta referi na e proceso di desaroyo cu ta drenta den otro y cu hunto ta forma e renobacion di Corte Comun.
Corte Comun tin localidad den cuater pais, cada uno cu su propio dinamismo y complexidad. “Diversidad den unidad ta probablemente e miho manera pa describi esey”, presidente di Corte Comun ta scirbi den su introduccion. Corte Comun tin e deber pa garantisa union den hurisdiccion den tur e paisnan mas miho posibel, aunke cu tin mas y mas diferencia den ley y regulacion. Den tur e paisnan seguridad huridico, sentencianan pronostica y di bon calidad ta hopi importante. Por mira esakinan bek den e proyecto- y desaroyonan di Corte Comun riba e diferente terenonan di hurisdiccion, principalmente hurisdiccion administrativo y fiscal.
GEAR
E programa GEAR, cu ta para pa ‘Gerechtshof Algemeen Register’ ta den desaroyo for di 2015. Obhetivo di e programa ta pa registra casonan cu drenta na un manera integral y uniforme. For di tempo cu a establece Corte Comun tabata tin e intencion di sali for di cuater diferente sistema y yega na un sistema integral y automatisa pa registra cartanan di peticion, ‘bezwaarschrift’, cartanan di apelacion y casonan penal, y pa monitor desaroyo di casonan. Introduccion di e sistema nobo lo forma un bon base pa mas modernisacion y digitalisacion di hurisdiccion.
Hurisdiccion administrativo
E cooperacion di Corte Comun cu e Departamento di Hurisdiccion di Raad van State ta continua pa por duna hurisdiccion administrativo (bestuursrechtspraak) na e nivel mas halto. Fuera di esey ta keda haci esfuerso pa nos tin sosten huridico cualitativo local.
Hurisdiccion fiscal
Aña pasa a introduci hurisdiccion fiscal den segundo instancia na Aruba y na islanan BES. Esaki ta conta pa Corsow y Sint Maarten tambe entrante 2016. E cambio aki ta trece un manera nobo di traha y tambe centralisacion. Un parti di e trabou cu prome tabata centralisa na Corsow a bai Aruba. E localidadnan di Corte Comun den e otro paisnan ta keda funciona como ‘front office’, y ta tene casonan fiscal den tur e localidadnan. Entrante 1 di augustus 2015 a cuminsa un hues fiscal den prome instancia. For di e momento ey tin casonan fiscal cu mas regularidad y ta trata e casonan mas lihe. Tambe ta garantisa e calidad di hurisdiccion fiscal na Corte Comun door di cooperacion cu huesnan fiscal di Gerechtshoven Hulandes.
Huesnan local
Corte Comun ta keda haya e asistencia di Huesnan for di Hulanda deseabel, pero mester bin un bon balansa cu e cantidad di huesnan local. Ta p’esey ta recruta y ta duna preparacion intensamente, caminda ta contrata huristanan hoben pa sosten huridico.
Cantidad di caso
E cantidad di caso cu a drenta tabata mas halto cu e aña anterior, 36.188 den 2015 compara cu 34.953 den 2014. E crecemento pa gran parti ta debi na e casonan ariba tereno di derecho penal, en particular e categoria infraccion (overtreding). E cantidad di casonan di infraccion a subi na casi tur localidad compara cu aña 2014, esta 18.667 den 2015 y tabata 16.433 den e aña anterior.
Por constata cu tin fluctuacion den e cantidad di casonan cu ta drenta tanto den e diferente categorianan di caso, como entre e localidadnan. No tin motibonan particular cu ta aclaria esaki y ta dificil tambe pa pronostica e cambionan. Intercambio di informacion cu partnernan den e cadena hudicial ta necesario, ya asina por planea e capasidad di hurisdiccion mas mihor.
E casonan grandi y esnan cu ta exigi hopi trabou, entre otro casonan penal, ta tuma hopi tempo y capacidad di e Tribunalnan y di Corte Comun. El a causa retraso y stok di trabou den cierto hurisdiccion. Cada localidad ta diferente y cu judansa entre nan ta haci e tempo di proceso di casonan mas cortico.
Finansa
Corte Comun tabata tin un resultado positivo na 2015. Causa major di e resultado positivo aki ta gastonan di personal mas abou na tur localidad. E gastonan menciona ta mas abou ya cu no por a jena tur vacatura y debi na gastonan di pensioen cu a baha door di cambio den areglo di pensioen, cual ta ehecuta pa Algemene Pensioenfonds Curaçao (APC).
No obstante e resultado positivo, e base financiero di Corte Comun ta keda un preocupacion, paso e paisnan no ta cumpli cu nan debenan financiero na tempo. Corte ta traha di un manera consiente cu su gastonan y ta traha riba eficiencia den combinacion cu un miho servicio.
Fuente: comunicado di Corte
