Relato 2019 di Corte di Husticia pa e islanan Hulandes di Caribe a keda publica recientemente y ta duna hopi informacion tocante nan operacion durante e aña transcuri.

Den esaki a dedica por ehemplo bastante atencion na reorganisacion di su aparato, tambe cu inversion den automatisacion y mehoracion di procesonan administrativo, cu tin como consecuencia cu mester adapta entre otro e cambionan den proceso administrativo y den funcion. Esaki logicamente ta trece tension den trabao y ta p’esey e Beheerraad ta haya importante pa percura cu e proceso ta cana cu cuidao, cu tin un plan social solido y cu implementacion di e reorganisacion ta tuma lugar corectamente, asina e relato ta bisa.

E relato anual ta probecha di e oportunidad pa presenta e miembronan di e actual ‘Beheerraad’ cu ta dirigi e organisacion. Actual miembronan ta Kelvin Bloyden (St Maarten), Grace Maduro (Aruba y vice-presidente), Franklin Hanze (Curaçao) y Hans Janssen (Hulanda y presidente).

Tambe tabatin atencion pa e parti di entrada di huesnan local. A yama bonbini na tres hues local, un di nan, mr. Angèle Martijn ta di Aruba.

E sentencianan di Juzgado di Promer Instancia y di Corte ta ser publica riba e website rechtspraak.nl. A ripara cu na 2019 a sali menos caso publica cu na 2018. Ta intencion pa recupera esey y a cera un contract cu Landelijk Dienstencentrum (LCDR) na Hulanda pa facilita e proceso di ‘anonimisa’ e filenan. Esaki lo mester mehora e servicio tanto na usuario interno (huesnan y apoyo interno) y externamente (abogado y otro profesionalnan).

Corte Comun a atende na 2019 un total di 38.903 caso (output) riba diferente tereno hudicial. Remarcable ta cu ningun caso penal den cual Corte a duna sentencia, a bolbe di Hoge Raad pa trata di nobo, ni tabatin anulacion di sentencia.

E cantidad di caso entrante na 2019 pa tur isla hunto tabata 39.189 caso. Esey ta un aumento cu promedio di 5% compara cu aña 2018. Pa loke ta caso di ‘hoger beroep’ (apelacion) tabatin 1.327 caso loke ta un reduccion leve di 2% compara cu 2018. E reduccion mas grandi ta den caso entrante ta caso civil, caso laboral y ‘kort geding’. E output tabata 1.123 caso, un aumento di 20% compara cu 2018 pues un mehoracion.

Cantidad di caso a aumenta na Aruba

Pa Aruba, na 2019 a drenta (input) en total mas caso na Corte cu na 2018. Esaki pa categorianan manera caso civil: 312 na 2018 vs 466 na 2019; caso di famia: 760 na 2018 vs 851 na 2019; en total 3216 caso na 2018 vs 3418 na 2019. Pa loke ta ley administrativo (bestuursrecht) a mira hopi mas caso: un total di 678 caso na 2018 vs 957 caso na 2019. Aki ta resalta particularmente casonan ‘LAR’ cu ta caso di apelacion contra decision di un organismo gubernamental, cualnan tabata di e total aki tabata 290 na 2018 y no menos cu 550 na 2019.

Den casonan penal tabatin un aumento considerable, di 7.439 na 20018 te 9.547 caso na 2019. Un parti grandi di e aumento di e casonan penal ta den categoria di violacion di ley ‘leve’ (overtreding; infraccion) cu a subi di 3.890 te na 5.854, loke ta splica gran parti di e aumento total. Di otro banda, e casonan di delito ‘regular’ a conoce un reduccion, di 1.027 na 2018 te na 954 aña pasa.

E total general di caso atendi pa Corte y Gerecht in Eerste Aanleg tabata 13.922 na Aruba na 2019, un cantidad di 2.589 caso mas cu e aña anterior. En total e aumento di caso na Aruba a tabata mas halto cu e total di tur isla hunto, cual tabata 37.495 pa 2018 y 39.213 na 2019, un aumento di 1.718 caso.

Hopi mas detaye por haya den e relato anual cu ta disponible riba: gemhofvanjustitie.org.