Corte di Prome Instancia (GEA) a duna famia rason cu por cobra gobierno di Aruba pa daño y perhuicio. Alaves a repudia e actuacion di polis bisando cu accidentalmente of no, e tiramento ta keda ilegal. Hues mr. Lemaire a categorisa e actuacion como ‘absolutamente inecesario’. Corte a publica e veredicto awe cual hues ya a duna riba 5 di october 2016. Abogado defensor pa e famianan di e victima(nan) a pidi un suma di poco mas cu 600 mil florin, husando artikel 178 di e Strafvordering.
Caso
Dia 22 di februari 2012 na skina di Renaissance – den cercania di Seaport Cinemas – den coperacion cu Drug Enforcement Agency (DEA) di Merca, polis tabata vigilando un vehiculo bou sospecho cu lo tin personanan aden cu ta involvi den negoshinan ilegal y lo ta parti di un organisacion criminal. E vigilacion aki a inicia pa motibo cu un agente di DEA lo a acorda cu un otro sospechoso pa haci un transaccion di droga. Na momento cu mester a haci entrega di e droga, polisnan fuertemente arma a acerca e vehiculo y duna nan orden pa para. E prome informe tabata indica cu e personanan den e vehiculo lo a los tiro riba polis, algo cu despues cu investigacion a tuma lugar a resulta di no ta berdad. Pa motibonan te ainda desconoci, polis a “sefta” e auto completamente cu bala causando bida di e dos personanan di nacionalidad Colombiano. Den e auto a encontra 12 paki cu tabata consisti di 12.42 kg di cocaina.
Sentencia
E suma exacto cu e famia a apela na corte ta 606.098,06 florin. E suma aki a keda rechasa y segun e veredicto, pais Aruba mester paga dañonan di 61.971 florin na famia di e victima. Un di e motibonan principal cu GEA a rechasa e suma pidi pa e famia, ta paso cu no por a prueba cu di berdad e victima tabata gosa di un entrada legalmente hustifica y ta parse mas bien cu esaki tabata bin di negoshinan ilegal.
No ta conoci ainda kico lo ta e sigiente pasonan di e famia. Bon Dia Aruba lo tuma contacto cu e abogado defensor mr. David Kock pa mas informacion riba e caso aki.
