Corte, abogadonan ta pendiente pa e Codigo Civil nobo pa hopi aña caba; Un amienda pa regla registracion di partner ta stroba ciudadanonan den otro derechonan

Leynan pa proteha mucha, incluso e codigo di proteccion pa mucha no a haya su base legal ainda. Tur pasobra, Parlamento un biaha mas a pospone e tratamento di e ley di implementacion pa e cambionan di e bukinan di Codigo Civil.

Hopi por kere cu e posponemento tin solamente efecto pa e registracion di partner cu ta inclui partnernan di mesun sexo, pero e implicacion ta bay mas cu esey. Es mas, e posponemento tin efecto pa diferente di e bukinan di Codigo Civil, cu consecuencianan pisa pa casonan den Corte actualmente. Casonan cu no tin nada di haber cu e derecho di parehanan di mesun sexo cera un contract di convivencia cu otro.

Parlamentario Independiente Daphne Lejuez, den un carta pa Presidente di Parlamento ta puntra di con no a fiha e fecha pa e tratamento. E notificacion cu e tratamento lo sosode te proximo aviso, “siendo cu tur e otro reunionnan publico cu a keda posponi si a haya un fecha alternativo.”

E Parlamentario a señala cu e cambionan den e Codigo Civil ta valioso pa comunidad, den sentido cu nan ta regla derechonan manera e areglo nobo di escogencia di nomber; areglo di registracion di partner; revision di e ley di propiedad di matrimonio; introduccion di e determinacion legal di derecho di tata; revision di e areglo pa autoridad comparti despues di divorcio; determinacion di derecho nobo di herencia; revision di acuerdonan special manera huur y derecho laboral. E Parlamentario a urgi Presidente di Parlamento pa por duna un contesta mas pronto posibel riba cual lo yama e reunion publico pa trata e ley.

Locual ta stroba e Codigo Civil nobo

Pa Desiree Croes, abogado y ex Parlamentario di AVP, e ta otro forma pa nenga derecho na hende. Y e no ta papia di e areglo legal di partner, cu no ta referi unicamente na parehanan di mesun sexo. Es mas, e areglo ta dirigi tambe pa personanan heterosexual cu no ta casa pero kier un cera otro tipo di contract cu otro.

Mr. Croes a splica cu e mes a haya su mes cu casonan unda Hof a indica cu nan no por aplica e leynan di Codigo Civil nobo cu a pasa, pa motibo cu ainda no a pasa e invoeringsverordening. Y cu e motibo lo ta e amienda pa registracion di areglo di pareha. Den otro palabra, aunke cu Parlamento a aproba pa cambionan den e Codigo Civil, mirando cuanto biaha a pospone su tratamento, e ta duna impresion cu locual ta stroba ta e aspecto cu a lanta hopi discusion mas di cuater aña pasa ora cu a present’e den Parlamento.

Codigo Civil moderno

Segun Mr. Croes, hendenan ta perdiendo caso den Corte pa motibo cu no a pasa e ley di implementacion y como tal, e Codigo Civil nobo no ta formalmente vigente. “E ta un problema pa hopi abogado y hueznan tambe, pasobra Aruba ta unico e pais den Reino cu no a modernisa su Codigo Civil ainda, y tur esey pa motibo di e amienda.”

Si e ley pasa, Aruba lo haya e Codigo Civil mas moderno di Reino. Realidad ta cu mayoria di e leynan den e Codigo Civil ta copia di esun di Hulanda, cu algun diferencia. Locual e Codigo Civil nobo di Aruba ta regla ta algo cu ni Hulanda tin, esta cu ta bay duna tatanan autoridad riba nan yiu, na momento di reconoce nan yiunan. (red. Bon Dia Aruba conoce un caso recien unda un Mama a dicidi di muda pa Hulanda, sin mester pidi autorisacion di tata di su yiu chikito. A pesar cu e yiu tabata reconoci, pa ley actual, e tata no tin ningun autoridad riba e mucha, y como tal, no por a evita cu e mama ta bay cu e mucha.)

“Pero fuera di e cambio ey, hendenan por bay duna nan yiunan dos nomber, pa elimina e discriminacion di e mama cu nunca por pasa su fam pa su yiu, den caso cu e yiu ta nace den un matrimonio. Ta crea e posibilidad pa tur dos fam di e mayornan keda formalisa. Pa hopi hende esey ta importante.”

Locual si por sosode cu ta anticipa e cambio di ley, pero e ta rekeri e ora cu personanan mester haci gasto y bay Corte. Por ehempel, tabatin caso di un mama cu a pesar cu su yiu ta reconoci pa e tata, no tabata kier pa e mucha carga e fam di e tata. E mester a bay Corte pa argumenta e motibo. Na final, despues di un lucha legal largo el a logra. Pero si a pasa e Codigo Civil, lo no tabatin e problema ey. “Tin hende mester bay hasta den apelacion, bay mucho mas leu pa un derecho, mientras cu de facto e ley a pasa caba. E unico detaye cu falta ta e aprobacion pa implementacion.”

Proteccion di e casa cu ta sobrevivi

Un articulo nobo ta pa proteha e pareha cu sobrevivi mas largo, esta e asina yama ‘langstlevende echtgenoot.” Segun Mr. Croes, awor ta asina cu den caso cu tin yiu, sea e tata of mama mester cumpli cu exigencia di e otro herederonan. Y tin hopi ehempel, con yiunan cu nunca a preocupa cu nan mayornan, ora uno muri, ta exigi nan herencia y ta hinca e pareha cu a sobrevivi den hopi problema financiero. Es mas, tin hopi caso cu mester a caba na Corte, unda yiunan di e prome casa a saca e viuda of viudo (di dos casa) for di e cas unda cu e ta biba. sin cu tin algo cu por haci contra. “Awor aki mi tin un caso asina andando. Door cu mi sa cu mi por anticipa e ley, mi lo gana e caso. Pero e ta nifica si cu e cliente mester paga hopi placa, sin cu mester. Pasobra e ley a cambia caba. Ta implementacion ta locual ta pendiente.”

Pues ta e ironico cu ciudadanonan mester bay Corte pa bringa pa un derecho cu nan tin, y ta den ley, pero pa un motibo of otro, Parlamento no ta vota pa e drenta den ehecucion. “Un ciudadano no por keda den insiguridad pa asina largo. Ta bayendo pa mas di cuater aña cu pueblo ta para den insiguridad kico ta conta pa nan. E ley bieu, cu realmente no tin validez pasobra tin uno nobo cu no ta den ehecucion. Pues mester keda anticipa cada biaha den Corte.”

Anticipacion of kiebro

E triki pa abogadonan actualmente ta pa anticipa e ley dilanti Corte. Pero, den e Codigo Civil nobo tambe tin leynan totalmente diferente cu practicamente ta ‘kibra’ di esun bieu. Y den un caso asina no por argumenta anticipacion den Corte. “Ora tin cambio grandi cu ta kibra di e bieu, Huez ta scoge pa e bieu. Mi tin un caso asina aki, cu mi cliente ta bay perde. A pesar cu e ley ta cambia, pasobra a tarda di pone e ley den ehecucion.” Ta trata aki di un caso di concubinato, cu ta regla pa e ley bieu. Locual no ta regla den e ley bieu ta e derecho pa herencia. Den e Codigo Civil nobo, e aspecto di herencia ta regla. “Den e Codigo Civil bieu, un persona tin derecho di alimentacion despues di biba tanto aña cu su pareha. Pero den e ley nobo, e tin derecho tambe despues cu su pareha fayece, y tin derecho riba herencia. E lo tin derecho pa keda den e caso, haya pensioen. Pero e ley no a drenta den ehecucion. Pues, mi cliente, cu ta hetero, Arubiano comun cu tin derecho pa haya proteccion no por haci uzo di un ley cu ta aproba. Ta hendenan cu kier nan derecho, y nan ta pega.”

Deshereda yiu

Den e mesun liña, e Codigo Civil nobo no ta duna yiunan derecho automatico pa herencia di nan mayornan. Rond mundo a cambia e derecho riba herencia automatico, pa motibo cu tin hopi caso, unda yiunan ta ignora, maltrata nan mayornan y unicamente ta aparece ora cu mester reclama e herencia. “Tur e cambionan tin e mesun esfera. Antes e tabata asina cu ta spera di mayornan tin un obligacion pa laga nan yiunan cu herencia. Hulanda, Corsou y St. Maarten a cambi’e, pero Aruba no. Pues awor aki, yiunan cu nunca a cuida nan mama of tata, ainda por reclama sea e cas of cualkier otro material, mientras cu ta otro hende a cuida e difunto.

Hamerstuk

E Codigo Civil nobo ta completamente cla, y hasta e ley pa implement’e ta cla y solamente mester vota riba dje. Segun Desiree Croes, mas bien e ta un ‘hamerstuk,’ esta cu ta cuestion di djis aproba. “E registracion di partner ta un parti masha chikito. E amienda ta un porcentahe asina chikito di tur e cambionan. Pero mester bisa si cu ta door di e amienda ey, mester a cana henter e caminda di nobo pa e Codigo Civil.” Normalmente ora cu vota pa e leynan asina, e ta bay Gobernador cu ta firm’e y ta drenta den ehecucion despues. Pero pa motibo cu a saca e asina yama schakelbepaling di e prome amienda cu ami a presenta cu ta haci e areglo di partner similar na un matrimonio, a dicidi pa regl’e den un otro buki di e Codigo Civil, y no bou di e mesun buki cu ta regla matrimonio. Pa a yega na un acuerdo na 2016, e lidernan di fraccion e tempo ey a bin cu un di tres amienda, “cu ta practicamente mi amienda. Esther Spaans di Direccion Huridico y Legislacion a formula e amienda.”

Mester bisa cu pa motibo di cu no a pasa e ley di ehecucion, 7 di e 8 Bukinan di e Codigo Civil no ta den ehecucion. Ironia ta cu Buki 2, cu ta trata personanan huridico (rechtspersonen), si ta den ehecucion. “Y nos a trata e Buki aki despues,” Croes a bisa.

Mester bisa cu un di e aspectonan yamativo ta e meldcode y pasonan pa proteha derecho di mucha. Esakinan tur ta regla den e Codigo Civil nobo. Bon Dia Aruba lo amplia riba e aspecto aki den nos proximo edicion.