Ayera mainta na corte di prome instancia a ser trata e caso cu minister di Enseñansa y Deporte Jan Hendrick “Endy” Croes a entama contra Tera News H.O.D.N Headlines Group specificamente contra e periodistanan di 24ora Patrick Paskel y Nelson ‘Speed’ Andrade, e minister a pidi un rectificacion na Paskel y Andrade debi cu nan a yamele “Ex-convicto” y ademas pa otro publicacionnan cu e mandatario ta considera cu ta atacha su bon nomber.
Abogadonan di minister Croes, Anthony Ruiz y Milaynie Reinkemeyer a señala cu dia 9 di april e dos presentado di e programa Enfoke 90 a califica e minister como “Ex-convicto” den e caso di Fundacion Lotto pa Deporte na unda e abogadonan ta sigura cu e palabra convicto por ser traduci como un persona cu a ser condena penalmente. E dos presentado a procede na rectifica cu loke e minister a bisa na nan dia 23 di april, sinembargo, esey segun nan, no tabata aceptabel debi na e manera con nan a redacta y declara.
Nan ta di opinion cu e director y e doño di Headlines Group tin conocemento y ta aproba loke e dos periodista aki cu ta cay bou su responsabilidad ta bisa, igualmente nan ta señala cu nan ta haciendo campaña contra e minister Croes y cu nan ta pertenece na e partido politico AVP (e partido mayor di oposicion) e cual ta utilisando nan manera un agencia di PR pa haci e trabou sushi.
Despues di casi un decada y mey e difamacion contra minister Croes ta parce di no a yega na fin di su caminda y nan a ser cita pa un caso sumario y asina rectifica, minister Croes ta kere cu e acusacionnan no ta coresponde cu e realidad y tampoco tin fundamento, cu no ta existi ni un sentencia di apelacion of di casacion pa por conclui cu minister Croes a enrikece su mes y su famia cu fondonan di Fundacion Lotto pa Deporte, tampoco ta existi un sentencia hudicial di 22 di juli 2011 ni un sentencia di casacion di 30 di november 2012 cu lo a conclui cu Fundacion Lotto pa Deporte tabatin rason di retira Croes como director.
Ademas, nan a sigura cu 24ora a usa e rapport di Ernst & Young y nan ta haya cu Paskel y Andrade ta publica contenido di e rapport basa den nan opinion. Na november di 2012 HOF a declara Croes liber di acusacion pa malversacion di fondonan di Fundacion Lotto pa Deporte pero nan ta enfatisa cu 24ora ta atacha e bon nomber di e minister Croes siendo cu esey no ta e caso.
Pa loke ta trata e abogado defensor di Headlines Group, David Kock, el a bisa na hues Mr. T.A.M Tijhuis cu 24ora a publica e peticion di rectificacion di minister Croes y nan no ta haya cu mester rectifica ni honra e peticion ey pa motibo cu tin derecho di expresion liber y como medio di prensa 24ora tin e obligacion di señala cosnan cu ta mustra malo y cu un politico mester tin e lomba hancho pa haya critica.
Nan ta haya cu 24ora ta papia di e rapport di Ernst & Young cu ta trata di e caso di Fundacion Lotto pa Deporte cu ainda ta andando. 24ora ta haya cu minister Croes mester pidi rectificacion na Ernst & Young y no na 24ora.
Abogado Kock ta sigura cu el a lesa e rapport caminda ta menciona cu ruman di minister Croes tin companianan na unda nan ta enrikece nan mes.
Hues Mr. T.A.M Tijhuis a haya cu 24ora a publica cosnan cu a wordo presenta den pasado pa loke ta e retiro di Croes di Fundacion Lotto pa Deporte.
Abogado Ruiz di minister Croes a cuestiona e hecho cu nan no a haci investigacion ni ‘hoor en wederhoor’ como periodistanan sino cu nan a coy e rapport y publica, nan ta haya cu ta intencional pa pone minister Croes den mal posicion siendo cu HOF a bari esey for di mesa.
Hues Mr. T.A.M Tijhuis a puntra Paskel si nan lo sigui publica articulonan tocante esaki pa lo cual Paskel a nenga sacudiendo su cabes.
Hues ta bay studia e caso y pa dia 12 di juni lo dicta sentencia
Na 2010 Croes, director general di Fundacion Lotto pa Deporte, ta wordo retira pa medio di un decreto di hues basa riba un rapport di investigacion di accountants Ernst & Young Aruba (EY) alegando iregularidadnan financiero. Pa sanea su nomber Croes ta entama na 2015 un caso contra EY pa actonan ilegal, cual demanda ta ser otorga den Corte di Apelacion na 2018. Ta keda constata cu durante e investigacion a comete fayonan, entre otro door di no atene na e procedura di scucha tur dos banda.
A pesar cu e veredicto tambe a ser ratifica den Corte di Casacion, EY a keda mantene su posicion tras di e contenido di su rapport. Desde 2019 Croes tin un caso hudicial andando contra EY pa daño y perhuicio.
