Corte a rechasa peticion di SKOA riba decision di Minister Lampe

Minister Lampe y SKOA tin algun tempo caba den disputa cu otro pa un suma di placa cu e stichting a haya dos biaha. Minister di Enseñansa Rudy Lampe a tuma e decision cu SKOA mester paga esaki bek y pa verreken e pago den dos biaha cu loke gobierno mester duna e fundacion. SKOA sinembargo no ta di acuerdo y a dicidi di bay Corte contra e decision ey. Pero nan a perde.

Despues cu CAD a descubri den cuenta annual di SKOA cu e fundacion a haya dos biaha e suma di 970 mil florin, e mandatario a manda un carta den cual ta pone cu mester palabra un suma di subsidio pa 2021 pa loke ta e gastonan di limpiesa di e scolnan; cu mester pone bon cla den un documento cu SKOA a haya 970 mil florin dos biaha na 2015; cu 30% di e suma aki lo wordo “verreken” cu e suma di 1.085.000 florin di subsidio di operacion pa aña 2020; cu pa loke ta 2020 ta duna SKOA un adelanto di 794.000.

Tambe e Minister a bisa den e carta cu lo duna SKOA pago un biaha di 1.5 miyon florin pa e presupuesto di 2021, como contribucion pa e gastonan extra di limpiesa di e scolnan di SKOA relaciona cu e pandemia di COVID-19.

Pero contenido di e carta aki ta algo cu SKOA no por a bay di acuerdo cu ne. E fundacion ta sinti cu e decisionnan aki lo afecta nan seriamente. Nan ta persisti cu gastonan di salario di personal di limpiesa no ta cay bou gastonan di operacion pero mester wordo compensa for di e post di salario. Pero tambe ta bisa cu e normbedrag di subsidio di operacion no ta cubri tur e gastonan di personal di limpiesa. Esaki a causa cu nan a confronta un deficit riba presupuesto y no por a paga nan obligacionnan fiscal como doño di trabou. Tampoco ta di acuerdo pa “verreken” un parti di loke nan debe cu un suma di e subsidio di operacion di 2020. Nan ta persisti cu tur suma a wordo paga na nan segun ley. Si tin fayo, SKOA ta haya cu esaki no a culpa di nan. Nan a haya sa di esakinan despues di control di parti di e instancianan concerni, manera Departamento di Enseñansa. Un parti di 2011 pa 2016 a wordo verreken di un suma cu nan mester a haya ainda di gobierno. Nan problema ta cu e suma di 2015 minister kier verreken esaki apart. E suma di 1.5 miyon florin pa gastonan extra di limpiesa relaciona cu pandemia y un voorschot pa 2020 no ta suficiente.

Hues den su sentencia ta bisa cu SKOA a admiti di a haya e suma en cuestion dos biaha y cu no a paga esaki bek ainda. Ministerio di Enseñansa ta autorisa pa cobra bek e placa di mas duna. Banda di esai, niun momento e ministerio a bisa SKOA cu lo no cobra nan e placa.

Hues no ta haya malo cu e resto di suma e ministerio kier sigui verreken esaki den dos biaha den e gastonan di operacion.

Cu nan ta bisa e suma di 1.5 miyon florin extra no ta suficiente, Corte ta bisa cu SKOA no a specifica of mustra di con esaki no ta suficiente.

A base di ariba menciona, Corte no ta mira motibo pa desvia of bisa cu e decisionnan den e carta di e mandatario ta incorecto. Pa e motibonan ey a rechasa peticion di SKOA.