Expresionnan cu Nelson Speed Andrade a haci den su programa di noticia Enfoke 90 contra di Ophelia Beyde a salie di malo. Corte diaranson a ordena pa e rectifica e declaracion bisando cu e no tin prueba, pero si a nenga e peticion di Beyde pa pone un prohibicion riba e periodista pa papia den futuro riba dje den cuadro di investigacion penal Avestruz. Esaki Corte a haya ta viola e derecho di Andrade como periodista pa señala y critica.
Tin tres punto cu Beyde y su Abogado a trece dilanti durante tratamento di e caso cu no a cay na agrado. Den e noticiero e periodista a papia riba e investigacion penal di caso Avestruz. El a menciona cu Beyde como ex conocir di Leoncita Arends, a drenta su cas y a horta e password di su computer; cu Beyde durante eleccion di 2017 a parti pamfleta politico den cual el a acusa Leoncita Arends di practicanan dudoso relaciona cu terenonan di erfpacht di pais Aruba. Y cu Beyde ta un desastre como trahado.
A bini dilanti cu niun momento Andrade no a menciona cu el a tende esey di Arends mes.
Hues a bisa cu e prohibicion riba Andrade pa papia riba dje ta demasiado amplio y trece limitacionnan cpa Andrade su derechonan di expresion (como periodista).
Hues a bisa cu como periodista e tin derecho di tin su propio opinion, ta critico, informatica y / of lansando advertencia, hasta contra Beyde, basta cu tin base legal pa esaki. Si ta bay haci expresion di un persona basa riba informacion ricibi of di loke a tende, y cu ta atacha nomber y integridad di e persona, tan a su luga pa puntra e persona pa su reaccion y ambos banda wordo publica na mesun momento. Door di no haci esey, manera den e caso aki, no a actua segun reglanan periodistico.
Den e caso di hortamento di password di computer di Leoncita, Hues a bisa cu ora el a haci e expresion den su programa Enfoke 90, e no a menciona cu ta basa riba informacion di Leoncita Arends y tampoco tin prueba cu e la bisa esey despues. E expresion haci tabata un opinion di dje. Banda di esaki el a papia cu Beyde ta mal trahado. Segun el a bisa, e ta prueba esey pa e hecho cu e Gobierno a kita Ophelia for di trabou. Pero Hues a bisa cu den e sentencia di e caso cu Beyde a perde, nada di esaki ta wordo bisa. Esta cu el a wordo kita pa ta mal trahado. Ademas, despues a bolbe tum’e na trabou na Serlimar. Tampoco e tin prueba di loke el a bisa cu Beyde a reparti pamfletanan den eleccion di 2017 den cual e l a bisa cu Beyde a acusa Leoncita Arends di practicanan dudoso relaciona cu tereno erfpacht.
Den henter e caso aki Corte a pone den balans interes di ambos partido. Prensa no solamente por duna nan opinion cu por ta duro y pisa. Pero mester haci un diferencia entre loke ta declaracionnan y loke ta e decepcion di un periodista.
Tur esaki poni den balans a conclui cu e periodista mester rectifica den su noticiero, sin pone comentario acerca.
