Minister Rudy Lampe a trece dilanti cu nan no ‘ta corta pa loke ta calidad di enseñansa.” Ayera e mandatario a afirma cu e cortamento aki ta posibel, sin afecta e calidad di enseñansa. Esaki como un forma di contesta na e discusion di e ultimo dianan tocante cortamento riba presupuesto di enseñansa. Specialmente den e discusion cu tin riba cortamento di overtime den e oranan cu mester duna les.

Segun e mandatario, nan no ta bay corta pa loke ta e oranan di les cu e muchanan mester haya. Si por ehempel, e muchanan mester haya cierto les cu tin scarsedad di maestro, lo wordo paga e overtime di e maestro cu lo mester yena e vacatura aki pa no perhudica e muchanan. Pero loke si nan ta bay corta, ta riba loke e mandatario ta categorisa como ‘exceso’ sin cu e calidad di enseñansa no wordo perhudica.

E mandatario a bisa cu loke si nan ta corta ta riba exceso den gasto di enseñansa cu no ta necesario den e inversion cu tin den enseñansa. Sinembargo -segun e mandatario- esaki no ta kita cu nan ta haciendo un maximo esfuerso pa atende cu diferente trabou di drechamento di infrastructura escolar y pa mantene e calidad di enseñansa. Lampe a declara si cu nan lo continua cu e inversionnan necesario den nos scolnan, caminda el a cita pa ehempel, Colegio San Hose na Santa Cruz.

Reunion Simar
Tambe el a referi na e reunion ultimo cu nan a sostene cu delegadonan di SIMAR. Pa minister Rudy Lampe e reunion cu Sindicatonan di Maestro di Aruba (SIMAR) a bay den bon ambiente. Y si tin cualkier otro discrepancia cu por tin, e mandatario ta dispuesto pa bolbe sinta na mesa.

E Minister a laga sa cu diaranson ultimo, el a sinta cu Directora di Departamento di Enseñansa pa, mas pronto posibel, pidi un reunion cu SIMAR tambe. E funcionario aki ta esun cu aworaki ta negoshando cu e directiva di scol pa loke ta e problematica di structura salario di e docentenan. Tur e structura aki pronto lo wordo defini y e ta kere cu esaki lo trece claridad pa un y tur.

“Tur directiva di scol a bisa cu pa añanan caba nan tabata wardando pa un Minister bin cu un maneho al respeto,” el a bisa.

E mandatario ta kere cu e reaccion cu a wordo ricibi for di e directivanan di scol ta positivo. E maneho cu ta bin lo pone un standard. For di e standard ey -segun e mandatario- lo tuma decisionnan defini riba e diferente structura di salario pa asina sigura cu e suma no lo surpasa e subsidio di salario cu ta presupuesta. Den caso cu e gasto ta mas di loke a wordo presupuesta pa salario den enseñansa, e ora ey e mandatario tin cu bay wak den su presupuesto, con lo por atende cu e gasto ey. Segun e mandatario, nan ta purba di ta mas austero posibel cu nan gastonan pa crea e posibilidad cu nan por cubri e gasto ey.

“Ami no ta bay corta riba exceso pa otronan, si ami mes no ta corta ariba mi mes,” el a declara. E ta haya cu, como Ministernan, nan mester duna e bon ehempel, y cuminsa baha gasto riba nan mes. E ta argumenta cu den su gastonan como minister, e ta lo mas austero posibel den biahamento y te hasta sin chauffeur, etc…

P’esey e ta considera importante cu nan mester duna e bon ehempel como mandatario. Den e caso aki, Minister Lampe a referi cu e no por realisa biahenan di gasto miyonario y di otro banda, e ta bay corta den exceso den enseñansa.