(CuraçaoChronicle) – Corsou no tin e miho reputacion cu autoridadnan na Merca regardando traficacion humano. Corsou actualmente na na nivel 2 riba e ‘watch list’ y esaki ta solamente pasobra Corsou a ricibi un sorto di status di excepcion despues di un combersacion cu Consul-General Mericano.

Si e combersacion aki no lo a tuma luga, Corsou lo tabata marca na nivel 3.

Por compronde esaki for di un carta di minister di Husticia, Gilmar Pisas, na presidente di Parlamento, Charetti America-Francisca. Pisas a skirbi e carta basa riba un rapport riba traficacion humano prepara pa e Conseho di Cumplimento di Ley (Raad voor de Rechtshandhaving). Ademas di e rapport, Pisas tambe a mira e rapport anual riba traficacion humano for di Ministerio di Relacionnan Internacional.

Segun e minister, ta lamentable cu Corsou ta riba e ‘watch list’ di nivel 2 pa tres aña caba, maske esaki mester tabata nivel 3 basa riba e sistema di e rapportnan.
Danki na negociacionnan cu e consul Mericano y un solicitud pa un excepcion, Corsou actualmente ainda tin e status di nivel 2.

Segun Pisas, awo mester bay tuma accion urgente den e situacion di traficacion humano pa preveni cu ta clasifica Corsou como un pais di nivel 3.

Segun website di gobierno Mericano, riba ‘watch list’ na nivel dos tin paisnan cu no ta cumpli cu e standardnan minimo pero ta haciendo esfuerso significante pa mehora. Ademas ta calcula e cantidad di victima di forma severo di traficacion ta hopi significante of ta aumentando significantemente y e pais no ta tumando accion concreto proporcional, of tin un fayo pa duna evidencia di aumento den esfuersonan pa combati formanan severo di traficacion.
Nivel tres ta paisnan cu no ta cumpli cu e standardnan minimo y no ta haciendo esfuersonan significante pa mehora. Pa determina si un pais ta riba nivel 3, ta considera factornan, entre otro, si un pais ta un pais di origen, transito of destinacion pa formanan severo di traficacion; si empleadonan di gobierno ta complice den traficacion; e grado na cual gobierno ta dedica recursonan presupuestario pa investiga y castiga traficacion humano y obtene restitucion pa e victimanan; y con hopi e gobierno ta dedica na preveni traficacion humano. Merca ta aplica restriccionnan financiero riba paisnan cu ta na nivel tres.