Corsou lo sigui e ehemplo reciente di Aruba, y tambe ta considera baha interes cu mester paga riba fiansa pa estudio, asina Ret Karibense ta señala. Na e isla aki tambe tin pensa pa baha e interes te na cero porciento.
Siman pasa ministro di enseñansa di Aruba a anuncia e bon noticia aki pa esnan cu tin un prestamo pa paga caba y tambe pa e studiantenan cu tin pensa pa haci esaki den futuro. Sin ningun contratiempo por ta cu e medida ta na vigor desde 1 di januari 2020.
Un motibo importante pa haci e fiansa di estudio mas barata ta pasobra e islanan ta mira cu esnan cu a caba di studia ta keda Hulanda, entre otro pasobra ey nan ta gana mas placa y por paga e prestamo mas facil. Sin embargo, e islanan ta prefera pa e studiantenan cu a termina un educacion halto bolbe mas pronto posibel despues cu nan haya nan diploma. Esaki en vista di e falta di hende cu educacion avansa na tanto Aruba como Corsou.
E asina yama fiansa di Aruba (Arubalening) te 2015 tabata un fiansa di estudio caro cu un interes di amortisacion di 6%. Desde 2015 e interes a baha pa 3 te 2% y awor entrante otro aña te na cero. Ademas e ministro di enseñansa di Aruba, Rudy Lampe, a anuncia cu e studiante cu tin un fiansa ta core caba tambe ta probecha di esaki.
Na Corsou ministro di enseñansa, Marilyn Alcalá Wallé, kier baha interes di e fiansa local cerca Finansiamentu di Estudio Kòrsou (SSC, Studie Financiering Curaçao). Tabata e intencion cu e interes lo a baha entrante januari di e aña di 4 pa 2%. “E tempo ey e proposicion no a haya aprobacion den Conseho di Ministro pasobra tabata falta argumentacion. Pero e confiansa t’ey cu ta yega na cero porciento tambe.”
