(CuraçaoChronicle) – Corsou ta sigui viola e derechonan di muchanan door di separa muchanan Venezolano for di nan mayornan. Human Rights Defense Curaçao a reporta cu te hasta un baby cu tin apenas un aña y ainda ta bebe lechi di pecho a ser separa for di su mama detenido.
En total, e sistema di husticia a separa 4 mucha for di nan mayornan, incluyendo e baby. Tres di nan, di 5, 6 y 10 aña di edad, actualmente ta na un shelter. Sinembargo e mayornan no por ta cu nan.
Nan a ser intercepta pa Warda Costa dia 21 di september. Ora cu dos mama a aparece na warda di polis di Rio Canario alrededor di 10or di mainta, e muchanan tabata sushi, nan tabata hole pishi y tabata bisa cu nan tin hamber entre lagrima. E mama- y tatanan a keda aresta, pero laga den libertad e siguiente dia. Autoridadnan a duna orden pa laga nan yiunan atras.
E mama di e mucha di 5 aña tambe ta deteni. El a otorga su omo y tanta e autoridad (voogd) pa cuida e mucha mientras cu e ta permanece den detencion. Ayera nan kier a bay busca e mucha, sinembargo Ministerio di Husticia ta insisti den conduci un inspeccion di e cas y prepara un reportahe prome cu permiti esaki.
Siman pasa, corte fuertemente a critica gobierno di Corsou, declarando cu gobierno a actua fuera di ley pa medio di separa dos otro mucha for di nan mayornan, un violacion cla di Convenio Internacional tocante Derecho di Muchanan (CRC).
Loke ta preocupa e corte particularmente ta cu gobierno di Corsou no a procesa e reunificacion di e famia manera ta rekeri den articulo 10 di CRC y no a revela e menornan su paradero na e abogado ni e voogdnan. E dos mucha en cuestion a keda inmediatamente reuni cu nan mayornan despues di e veredicto.
