Organisacion Mundial di Salud (WHO) a declara e epidemia di Monkeypox como un malesa di interes internacional, e nivel di alerta mas halto cu WHO por declara. Esaki despues cu for di luna di mey di e aña aki diferente casonan di Monkeypox a keda raporta na WHO for di paisnan cu anteriormente no tabata tin casonan di Monkeypox. No obstante e echo cu tur persona sin importa sexo, edad of nacionalidad por keda contagia cu e virus di Monkeypox, datonan internacional ta mustra cu actualmente alrededor di 98% di e casonan di Monkeypox ta ser raporta bou di e grupo di hende homber cu ta tene relacion sexual cu hende homber (miho conoci como “men having sex with men”, MSM).

Cu e clasificacion di Monkeypox como un malesa di interes internacional, WHO ta pidi tur pais pa prepara pa identifica posibel casonan di Monkeypox y pa tuma e medidanan necesario pa evita transmision local di hende pa hende cu atencion special pa evita stigmatisashon y discriminacion di individuo y/of gruponan den comunidad.

Identificacion di posibel caso y monitoreo

Mientras cu Ministerio di salud, Medio Ambiente y Naturalesa a informa comunidad tocante di e malesa di Monkeypox na luna di mey di e aña aki, e departamento di Epidemiologia (EPI) y departamento di Infectieziektebestrijding (IZB) di Servicio di Salud Publico di Corsou (UO G&Gz, antes GGD) ta den preparacion pa cumpli cu e tareanan di monitoreo y control di e malesa respectivamente. Manera den caso di otro malesanan contagioso un colaboracion entre tur e partnernan, e.o. dokternan di cas, specialistanan y laboratorionan, ta esencial pa control di un malesa den nos comunidad.

Kiko ta Monkeypox i posibel síntomanan

Monkeypox ta un malesa causa pa un virus cu principalmente ta manifesta su mes na e parti west y parti central di Africa. E ta categorisa como un virus cu ta causa sintomanan leve. Muchanan, hende muhe na estado y personanan cu un sistema inmunologico suak (compromete) dor di malesa, tratamento pa un malesa of uso di cierto remedi, ta keda considera como gruponan di riesgo, cerca cual e virus por ta peligroso.

E malesa ta cuminsa cu e siguiente sintomanan: Keintura; Dolor di cabes;Dolor di musculo, curpa;lymfeklieren” hincha;Calafriu; Cansancio.

Despues di 1 pa 3 dia cu e sintomanan aki manifesta, ta aparece un “uitslag” (rash) kual ta cuminsa den mayoria caso na cara y ta expande bay henter curpa. E rash ta cuminsa como un flèk y despues e flèknan ta transforma bira bral. Despues cu e bralnan seca (y crea un capa; casca) nan te keda 2 pa 3 siman pa despues e bralnan seco (casca) aki cay.

Monkeypox por wordo facilmente confundi cu otro malesanan manera entre otro cende paga (waterpokken) of krentenbaard (impetigo). P’esei ta importante pa un persona cu tin sintomanan cu por ta relata na Monkeypox, tuma contacto cu bo dokter di cas pa e por haci e testnan necesario y haci e diagnostica corecto. Personanan indocumenta (migrantenan) por tuma contacto cu Fundacion Salud Pa Tur. Den caso cu un persona test positivo pa Monkeypox, e persona tin cu bay den isolacion te na momento cu e no tin niun bral seco (casca) mas riba su curpa (esaki ta tuma mas of menos 21 dia for di e prome manifestacion di e malesa).