Na diferente ocasion UPP a indica cu mas di 60% di nos famianan tin como entrada unicamente un salario minimo. E pregunta ta surgi e ora con e famianan aki por sobrevivi, principalmente pasobra segun e cifranan di CBS, e salario minimo no ta cubri loke ta necesario pa por sobrevivi (bestaansminimum). Cuanto e costo di bida ta aki na Aruba y con esaki ta compara cu Corsow? UPP a hasi un investigacion y e prome resultado ta parce di ta indica cu e prijsnan aki na Aruba ta mas halto cu na Corsou.
Con esaki por ta posibel? Corsou mescos cu Aruba tambe mester importa tur producto, pues pakico e diferencia di prijs. UPP ta di opinion cu ta parce cu tin companianan cu ta mantene e prijsnan di productonan artificialmente halto abase di palabracionnan di prijs (prijsafspraken). Pero tambe nos a bin encontra cu tin varios companianan cu probablemente ta abusa di prijsnan halto, pasobra nan so ta importa un producto of ta nan so ta duna e servicio.
Nos a investiga con otro paisnan ta bringa e fenomeno aki di “prijsafspraken” y nos a constata cu 52 pais na mundo a institui un autoridad pa combati esaki, e asina yama “Mededingingsauthoriteit”. Corsou desde 2014 tambe a introduci e autoridad aki cu tin como tarea percura pa e abuso aki wordo combati. Nos a bin compronde cu e mesun expertonan cu a traha riba e ley aki a traha un ley pa Aruba tambe y cu esaki ta for di 2013 den e lachi di e minister di Economia di Aruba. E concepto aki ta full cla pa wordo trata den parlamento. Ta obvio cu e ley lo bay haya hopi resistencia di companianan cu ta haci nan mes culpabel y segun nos informacion cu na Aruba tin mas o menos 15 grupo di comerciantenan cu ta haci esaki y cu ta poniendo hopi presion pa e ley no pasa. Esey ta e motibo tambe cu nos ta riparando cu ta PPA y UPP so ta na fabor pa e ley bin na vigor y e motibo ta obvio, nos no tin doño.
Nos a sigui cu nos research y nos a bay haci un comparacion di prijs entre Corsou y Aruba di varios productonan den supermercado tanto na Corsou y na Aruba y tambe prijs di bloki di cement y saco di cement. Nos a compara 18 producto. Un conocir a bay haci un paar di compras dialuna cu a pasa (nos ta conciente cu ta algun producto so ta den e macuto basico) y awe ela manda nos loke ela cumpra y cu esey nos a bay un supermercado pa compara. Aparte di esaki nos a haci un otro comparacion di cement y bloki. Na Corsou un bloki di 4 ta costa 1.71 y na Aruba esaki ta costa 3.10 y e bloki 6 ta costa 2.56 y na Aruba esaki ta costa 4.10. Un saco di cement ta 13.50 y na Aruba esaki ta costa 17.50.
Pues si nos pone esakinan den percentahe nos ta haña cu e prijsnan den supermercado na Aruba ta mas o menos 20% mas caro cu na Corsou y si nos tuma e prijsnan di e 3 otro productonan e diferencia den e prijs ta bira mas grandi ainda. Pa loke ta trata e bloki di 4, na Aruba esaki ta costa casi 45% MAS cu Corsou. Pa e bloki di 6 esaki ta 37.5% MAS caro cu Corsou. Y pa loke ta trata un saco di cement esaki ta 22.85% mas caro cu esun na Corsow.
E motibo cu UPP a haci e investigacion chikito aki ta pa evalua si tin diferencia di prijs entre e dos Islanan, pero tambe pa tin mas prueba cu ta indica e necesidad pa introduci e Mededingingsauthoriteit. Nos ta convenci cu e autoridad aki lo trece mas transparencia den e prijsnan na Aruba loke lo por percura cu e costo di bida lo baha considerabelmente. Alabes esaki lo percura cu tin un level playing field cu lo haci cu mas di nos hobennan lo tin e curashi di cuminsa un negoshi ya cu e companianan grandi lo no por stroba nan mas pa hasi negoshi.
Cu introduccion di e ley aki hunto cu e reglanan di Bon Gobernacion y e Swiss model, e pueblo den su totalidad lo por gosa di e desaroyo cu lo bay tin. Y esakinan hunto cu e seriedad y experencia cu e combinacion di PPA/UPP ta ofrece Aruba por ta garantisa cu nos lo hasi Aruba Great atrobe na unda e pueblo lo bay pa e siguiente nivel pa sigura un Miho Mayan pa nos tur.
|
