Nos hermana isla a bay urna electoral diabierna ultimo y awor ta hala rosea mas trankilo.
E temor tabata existi, te na Hulanda riba television nacional, cu un politico condena caba na tres aña di prizon pa lasonan cu mafia y den proceso di su caso den corte pa apelacion, lo por a aumenta su apoyo popular di tal forma, cu e actual coalicion crea bao di su liderazgo lo a keda na mando di e pais. Cu tur e consecuencia cu esey lo por tabatin den futuro cercano, inclusivo mas intervencion di Reino pa garantisa bon gobernacion.
E gran mayoria di votado a pensa sin embargo diferente y a yega un biaha mas na duna confiansa na dos partido di mas trayectorio, cu ta PAR y MAN, cu entre nan dos ya a yega na e 11 asiento cu nan mester como minimo pa por goberna. Por ta cu ta busca un base mas amplio añadiendo por ehemplo un partner manera e partido PIN cu un asiento, pero esey no ta estrictamente necesario. Cu e perspectiva di un gobierno di conoci bieu, cu a goberna varios biaha, haciendo cos bon y cos malo, tur preocupacion pa loke ta futuro cercano no a disparce. Na nan e tarea dificil pa pone un banda skepticismo di hopi hende y haci loke realmente mester haci pa saca economia di e isla dilanti. Un tarea nada envidiabel na e momentonan aki.
E eleccion di siman pasa a trece mas aspecto remarcabel. E deterioro di Pueblo Soberano di e lider asesina Helmin Wiels ta parce di bira completo den su ausencia. Pero tambe tabata remarcabel e retroceso den apoyo pa un partido nobo manera Corsou di Nos Tur di Amparo dos Santos, cu compara cu apenas mita aña pasa a haya un golpi formal, cu perdida di bon parti di su base. Aparentemente maneha un vocabulario menos decente no ta garantia pa exito duradero den politica y esey tambe ta bon noticia.
Sin embargo, mester constata cu un parti di e pueblo si a simpatisa cu e politico condena den corte di prome instancia pa su contactonan delincuente, cu talbes a beneficia di e invasion hudicial na ultimo momento riba su cas, en busca di prueba pa un posibel caso di soborno pa ‘cumpra’ un asiento den parlamento.
Un bon yora oportuno dilanti camara di television lo por a yuda den esaki. En todo caso, cu e perspectiva su dilanti di varios aña di prizon, no ta sigur cu su partido lo sigui progresa den añanan venidero. Tur cos ta depende di con e partidonan, eligi pa forma gobierno y seguidamente actua na bienestar di comunidad, lo bay haci nan trabao. Faya den e tarea aki lo por tin consecuencia inmediato, despues di e experiencia di ultimo par di aña.
Y na Aruba, kico nos por saca di tur esaki? Aunke e delincuencia den circulonan halto di gobierno cerca nos ta di un indole un poco diferente, nos tambe mester atende, como pueblo, e aspecto menos bunita aki. Ta logico cu e partido den gobernacion lo trata di presenta e asunto di tal forma, cu ta parce cu, si acaso, ta un appel putri so nan tabatin den nan seno, y cu esey poni un banda, bida lo ta sigui su curso trankilamente pa nan como partido. E asunto no ta asina simpel. Pa tanto partidonan politico cu a yega di goberna, como esunnan nobo riba escenario, ta conta e mesun consigna y esey ta: kico ta bay haci pa remedia e situacion den gobernacion, y con, detayadamente ta bay implementa esaki?
Nos ta referiendo concretamente na e hecho cu ta masha poco departamento di gobierno ta gosa di un structura interno di control, cu ta haci casonan manera esun den top di Labor imposibel, o en todo caso hopi mas dificil pa haci sin detecta, y un sistema hudicial cu ta funciona y ta haci su trabao, sin distincion di posicion cu e persona ta ocupa.
Como nota positivo, nos por tuma e anuncio cu presidente di parlamento a dicidi di honra e peticion di miembronan di oposicion pa atende e asunto di e ministro ‘riba non actief ’ den un reunion publico e siman aki. A warda, sin ningun motibo valido, te ultimo momento pa yama e reunion dentro di e termino stipula, pero en todo caso e reunion ta bay tuma luga. Mester bisa cu masha poco lo por bin dilanti di e caso mes, pasobra e investigacion penal ta andando. Pero lo ta interesante pa haya sa unda nos prome ministro ta para den tur esaki.
Durante e prome rueda di prensa el a declara caba cu e tabata na altura di un ke otro, y a adverti su colega mas hoben. E no por hala atras di e declaracion ey y lo mester duna un splicacion pakico e no a haci mas cu adverti… Pasobra den gobernacion, tur hende cu tin un puesto publico tin e sagrado deber di bay dilanti y denuncia cualkier delito cu nan ta detecta. Nos funcionario publico number un no a cumpli cu su sagrado deber?
