WILLEMSTAD,— Recientemente hues mr. Gruijters a trece dilanti cu e ta sugeri gobierno pa haci mantencion di caya aki na Corsou, mirando cu si un borchi no t’ey of strepi riba caya no t’ey mas, no por culpa e chauffeur pa esaki.
Tabata durante casonan di infraccion den trafico cu hues mr. Gruijters a bisa fiscal cu no por duna chauffeur boet, si e strepi nan riba caya no ta visibel. Ta trata aki di liña nan cu ta indica cu chauffeur por pasa of no. E hues a trece dilanti cu gobierno mester cuminsa haci mantencion di nos caretera mirando cu si e liña no ta visibel con un persona por sa cu ey nan no por pasa auto.
Pa esaki el a declara un chauffeur liber ayera despues cu e chauffeur a presenta cu foto pa proba cu riba e caya unda e tabata maneha su auto no tabatin strepi. E chauffeur mes a bisa hues cu e no tabata sa mes cu tin strepi ey nan y cu e ta haya gobierno mester cuminsa mantene e caminda nan pa asina evita cu hende lo pasa auto caminda no por haci esaki.
Hues a bisa den e caso cu den caso cu e borchi no t’ey, no tin control den trafico. Cu esaki e hues kier a referi cu sin borchi trafico por bira un caos y cu esaki gobierno tin cu trata na evita. Mas aleu el a splica cu si tabatin un accidente of di un manera of otro e borchi no t’ey mas mester buta esaki bek mas pronto cu ta posibel.
Pa esaki hues a sugeri prensa pa publica e situacion aki cu ta hopi serio, principalmente riba caminda di Banda Bou, unda auto ta pasa otro tur ora. El a declara s chauffeur liber den e caso unda mester a pasa auto caminda no por, unda el a bisa fiscal cu si e no ta di acuerdo e por apela.
