(CuraçaoChronicle) – Australian Communications and Media Authority (ACMA) a contacta e Minister di Finanzas di Corsou, Javier Silvania, pa preveni companianan di wega di placa licencia na Corsou di atrae hungadornan di Australia. Esaki ta pasando mientras e regulacionnan nobo di wega di placa ta den proceso na Corsou.
Corsou ta desaroyando un modelo nobo di licencia. E regulacionnan nobo pa cu wega di placa lo keda anuncia den simannan binidero. Anteriormente, e isla a anuncia cu lo tin regulacionnan nobo di wega di placa den e di dos kwartal di aña 2023. Corsou kier introduci e regimen nobo iGaming y haci e supervision di e industria mas estricto. Esaki no a ser bon ricibi pa cierto sector di e industria cu tabata gusta e isla su maneho poco estricto.
Corsou su ley nobo di wega di placa, LOK, ta permiti companianan aplica pa tanto un licencia B2C y B2B. Esaki ta valido pa un periodo di 5 aña. E structura actual di licencia master y sub-licencia no lo ser permiti mas.
Curaçao Gaming Authority (CGA) tin e tarea di licencia, aplica y supervisa tur compania cu tin licencia.
ACMA a identifica varios website cu licencia di Corsou ta opera den Australia. Esaki ta den violacion di Australia’s Interactive Gambling Act di aña 2001, cual ta prohibi wega di placa den deporte y iGaming. Apesar di e advertencia di e regulador Australiano, e companianan ta sigui opera na Australia.
ACMA a expresa cu nan ta dispuesto pa traha cu CGA pa tuma accion contra e provision di wega di placa online den violacion di e ley Australiano. Anteriormente e aña aki, ACMA ya caba a otorga un ordo pa blokia e IP di e websitenan cu licencia di Corsou.
