E pregunta ta si refineria Isla por sigui scapa sancionnan Mericano contra Venezuela. Prome Minister Rhuggenaath no por duna un garantia. El a bisa cu e no por garantisa cu e Oficina di Control di Activonan Stranhero (OFAC) lo acepta e solicitud di gobierno pa haci un excepcion pa refineria na Corsou. E prome minister a anuncia esaki den un carta na e sindicatonan cu ta representa e trahadonan di e refineria di petroleo.
“Esaki tin di haber cu e echo cu e situacion di Venezuela , pero tambe e relacion entre Venezuela y Merca, esaki ta hopi dinamico y e desaroyonan ta pafo di nos sfeer di influencia. Como gobierno nos ta haci tur posibel pa asina evita cu nos pais ta converti den un victima di un sancion geopolitica den e situacion tenso”, Rhuggenaath a bisa den e carta.
Rhuggenaath a bisa cu e contacto di e solicitud pa OFAC, RdK ta coopera cu abogadonan na Washington DC kende ta specialisa den e asunto aki y tin bon contacto cu OFAC. “Esaki ta un garantia cu e solicitud lo cumpli cu tur rekisito di OFAC y cu nos tin un contracto optimo cu OFAC na Washington pa splica nos situacion detayadamente”, Prome Minister a bisa y a recorda e sindicatonan cu e base di e referencia di RdK pa e solicitud na OFAC ya a ser manda pa e sindicatonan dia 22 di augustus.
Anteriormente, Merca a atende un solicitud y e combustibel por a ser refina pa mercado local. E contract cu e operado actual di refineria PDVSA ta caduca dia 31 di december venidero.
