Tanto na Corsou, como den politica di Den Haag a surgi conmocion tocante mandatario politico na e isla cu riba cuenta di e pagado di belasting ta gana centenares di miles di florin. Segun Prome Minister, Eugène Rhuggenaath, esaki lo para mas pronto posibel.

Den medionan social tin documento cu a lek, caminda por mira cu e diferente mandatarionan publico na Corsou ta gana entre di 700.000 y 1.1 miyon florin y cu un director tin un auto na su disposicion cu ta bal un miyon florin.

Den politica na Den Haag tambe tin indignacion tocante e ‘entradanan cumbre exorbitante aki’. Parlamentario di SP Ronald van Raak ke aclaracion y a haci pregunta por escrito na Secretario di Estado Raymond Knops (Relacionnan den Reino).

E discusion tocante entradanan cumbre ta yega na un momento politicamente sensitivo, pasobra Den Haag a forsa e isla pa economisa centenares di miyones. “Di un banda nos ta hopi severo si ta trata di e presupuesto oficial, pero di otro banda ta masha hopi cen ta bay pa e companianan di gobierno ey”, Van Raak ta bisa. Esaki ta segun e fuente Retkaribense.

Prome Minister Rhuggenaath ta laga sa cu durante di e temporada di gabinete aki lo bini cu medida. Den futuro no ta permiti mandatario cerca companianan di gobierno y fundacionnan di gana mas cu 130 porshento mas cu un minister. “Esaki ta comparabel cu e asina yama norma di Balkenende.”

A lek for di servicio di belasting di Corsou?

Prome Minister Eugène Rhuggenaath di Corsou ta yama e posibel lek ‘preocupante’ y ta bisa cu e lo laga investiga inmediatamente si e documentonan ta autentico. “Nos ta spera cu esaki no ta e caso”, e Prome Minister, cu ta teme cu den e caso aki e privacidad di ciudadano ta na peliger na servicio di belasting, ta bisa.

“E ora ey nos ta haya nos cu un situacion serio, caminda no por confia cu informacion personal of informacion fiscal ta haya trato confidencial cerca servicio di belasting.”

Prome Minister Rhuggenaath ta priminti cu lo bini mas transparencia ora ta trata di placa publico. Gabinete lo investiga den ki medida e entradanan cumbre y e gastonan na e companianan di gobierno y e fundacionnan lo bira publico.

Tambe ta e intencion cu lo bini supervision independiente riba tur compania di gobierno y fundacion. Un instancia asina mester controla e entradanan y percura pa maneha placa publico bon. “Esaki actualmente no ta bon organisa ainda”, Rhuggenaath ta bisa.