Autoridadnan policial ainda ta investigando pa haya sa kico ta eventonan cu a conduci na hayazgo di e curpa sin bida di un persona Venezolano dia 9 di juni 2019 mas o menos 8 kilometer for di altura di Bullenbaai.
Di e autopsia cu a haci riba e curpa por a conclui claramente cu e persona a fayece pa via di a hoga. Ora cu autoridadnan a haya e curpa aki diferente version di kico lo a pasa cu e curpa a cuminsa circula. Ta menciona cu lo por a tin un incidente riba lama cu e boto cu tabata biniendo for di Venezuela rumbo Corsou y ademas cu lo tabatin mas persona a bordo.
Ademas tin informacion unda lo haci mencion cu mas persona lo por a fayece di e manera aki. E informacion aki a yega polis pero te ainda no por confirma esaki y e investigacion ta siguiendo. Entretanto a cuminsa cu e proceso pa identifica e curpa pa asina alabes por pone e famia di e fayecido na altura y tambe pa comparti e informacion aki en general.
