Segun director interino di Refineria di Korsou (RdK) Marcelino de Lannoy, mirando cu industria petrolero ta rekeri hopi inversion di capital, tin duda cu Corsou lo por tuma over e refineria.
“E idea cu Corsou y of Refineria di Corsou lo por opera Isla (refineria) su so ta zona interesante mirando cu casi tur empleado ta yiu di Corsou, pues nos tin e experticio den cas, e ta finalmente algo imposibel pa via di tur e placa rekeri pa ta envolvi den e industria.”
E mesun limitacion tin caba, mirando cu actualmente tin dos partido cu lo kier tuma over Isla pero cu no tin e recursonan financiero necesario pa haci esaki posibel. E ehecutivo halto di RdK ta calcula cu un minimo garantia di mey biyon dollar ta necesario pa tuma over e compania estatal. Cu un prijs di 250 mil bari pa dia y 50 dollar pa cada bari, 12.5 miyon dollar ta rekeri. No pa luna, pero diariamente.
Ademas e ehecutivo ta splica cu pa cumpra e refineria, bo lo mester ta sigur cu bo lo por logra e margennan corecto ora di bende producto petrolero pa asina tin suficiente ganashi pa paga salarionan y mantencion. Si e refineria ta tranca, e fluho di crudo y transporte di 800 pa mil barco anual mester conoce un maneho adecua. “Un gran cantidad di capital ta rekeri pa haci esaki y ademas bo mester tin suficiente reserva en caso cu algo bay fout.”
RdK y pais Corsou no por maneha esaki. ‘E ta un idea noble, pero e base financiero p’e no t’ey’, segun de Lannoy. Corsou tambe ta mirando e posibilidad di un socio cu lo por financieramente garantisa cu nan lo bay entrega e crudo despues di 2019, pero actualmente tambe, mirando cu mas y mas ta parce cu PdVSA no por maneh’e. “Un tal acuerdo di procesamento lo por ta interesante, pero mayoria interesado no kier tuma un riesgo financiero tan grandi.”
