WILLEMSTAD – E hospital nobo cu ta trahando den Otrobanda lo no habri si no tin garantia cu tur cos ta cana bon. “Nos no lo tuma ningun riesgo”, asina Wallé a bisa a rais di publicacionnan di e siman aki cu e fecha di entrega kisas lo bay schuif un poco mas leu atrobe.
E construccion ta canando algun luna atras riba e skema y ya a cambia e fecha di entrega na diferente ocasion. Ultimo fecha di entrega cu a anuncia ta dia 15 di november awor. Pero si ta necesario lo extende e fecha aki cu algun siman mas. Di tur manera lo sigui haci esfuerso pa yega e fecha ey pero si no tin e garantianan necesario, mester warda, asina Wallé a bisa.
Wallé a bisa tambe cu ta controla tur aspecto debidamente di e proyecto. E compania AT Osborne, un di esunnan di mas renombre internacional riba e tereno aki, ta check tur detaye di e construccion y tambe aspectonan cu tin di haber cu e makinaria den e instituto nobo. Si ta pochi wc mester cambia, lo mester haci esey. Si tin otro cos cu no ta bon, tambe lo atende esey, asina Wallé a remarca. En total e compania tin den careda di 8 mil punto pa check durante e proceso di control. Un aspecto importante ta, segun Wallé, cu aki no ta trata djis cambio di un edificio pa un otro edificio. E espirito di e proyecto di un hospital nobo ta cu mester bay wak henter nos ambiente di salubridad di un otro forma. E hospital nobo ta un di e catalisadonan den e proceso aki, asina el a splica.
E proyecto a hay’e ultimamente ta atende un gran cantidad di informacion cu ta eroneo y incorecto. “Si djis yama nos, por a atende tur punto cu ta bin den publicidad di cua diferente ta fake news. No obstante esey nos ta sigui traha dirigi. Nos lo no perde nos enfasis pa Corsou haya un hospital ultramoderno y un vision nobo riba tereno di salubridad, asina Wallé ta bisa.
