WILLEMSTAD — Recientemente Fiscal mr. Out, kende a trata casonan di infraccion den trafico, a trece dilanti cu pa otro aña boetnan di pasa auto lo subi y bira 500 florin. Esaki ta mirando cu tin varios accidente na Corsou pa pasamento di auto.
E fiscal a trece esaki dilanti ayera despues cu tabatin un caso unda un persona lo mester a pasa un auto caminda no tabata mag. Tabata den cercania di Centro Medico Souax cu e chauffeur a ser para pa un miembro di cuerpo policial, unda el a bisa cu e no a mira e strepi cu ta prohibi pa pasa auto.
Segun e chauffeur cu, algun rato despues cu el a pasa un auto, a ser para pa polis; a bis’e cu el a caba di pasa un auto caminda e no por haci a esaki. El a bisa cu e no ta compronde dicon el a haya un boet pa un strepi cu ta invisibel. Mas aleu el a splica cu e no ta haya cu e mester haya un multa pa e infraccion mirando cu e strepi cu ta indica cu no por pasa niun auto no ta visibel, esta cu esaki no t’ey mas.
Fiscal mr. Out na su turno a splica cu tur hende cu ta biba na Corsou sa bon, cu ora bo subi caminda pa bay Banda Bou, tin un strepi riba caminda cu ta indica cu no por pasa auto. El a splica cu e pasamento di auto ta birando dia pa dia mas peligroso y cu ta bay man duro cu esunnan cu ta core iresponsabel.
Fiscal Out a splica den e caso cu entrante januari di aña 2020 boet pa cu pasamento di auto lo bay subi. Segun fiscal cu actualmente e boet aki ta 150 florin y ta mucho abou pa un echo asina grave. El a trece dilanti cu entrante januari di aña 2020, e boet aki lo bira 500 florin y cu ta bay traha duro pa stop cu esaki, pa asina evita e cantidad di accidente nan cu tin actualmente Corsou.
