Recientemente mas o menos cien ex studiantenan na Corsou a uni nan mes pa motibo di mal comunicacion cu DUO pa añanan largo, a hinca nan den problemanan financiero. Minister di Enseñansa di Corsou, Marilyn Alcalá-Wallé (PAR) ta sostene nan den nan lucha.

E ex studiantenan ta bisa cu nan kier ‘paga nan debenan mas pronto posibel’, pero DUO ta stroba nan.

Segun e fuente Retkaribense, Minister di Enseñansa di Corsou ta papia hasta di un ‘liña no integro’ entre DUO y e deurwaarder local, y a manda su colega Minister Hulandes un carta urgente unda ta pidi pa un ‘investigacion profundo’.

“DUO ta comunica via e-mail cu post. Bo por yama tambe. Sinembargo studiantenan mester warda hopi tempo pa haya claridad riba nan debe pa yega na un areglo di pago husto”, asina Rossy Reyna, consehero financiero di e departamento di Enseñansa, Ciencia, Cultura y Deporte ta indica.

“Mientrastanto e deurwaarder si ta tuma medidanan lihe pa cobra placa y tampoco ta duna mucho cooperacion pa yega na un areglo di pago husto”, segun Reyna.

Midimento di carga financiero ta insuficiente
Ex studiantenan ta bisa cu DUO no ta tene cuenta suficiente cu circunstancianan local di Corsou den nan calculacion di gastonan mensual. E salarionan ta hopi mas abou compara cu na Hulanda y tin un otro sistema di belasting.

“Mayoria di e ex studiantenan kier paga nan debe, pero e gastonan mensual mester ta pagabel si”, Richanel ta bisa, un di e voceronan di e ex studiantenan.

“Nos ta tende di sumanan di 1500 florin Antiano (740 euro) pa luna, cual ta mas cu e sueldo minimo na Corsou.”

Jerry, kende ta un otro vocero di e ex studiantenan, ta bisa cu DUO ta tuma e salario bruto den nan calculacion di capacidad financiero. “Esey no ta e suma cu ami ta ricibi riba mi cuenta. Ainda mester kita mi seguro medico SVB y otro impuestonan.”

Ta alerta deurwaarder mucho lihe
E ex studiantenan ta haya cu DUO ta alerta deurwaarder mucho lihe prome cu nan a yega na un solucion.

“DUO Hulanda ta hung’e asina cu ex studiantenan di biaha ta cay bou deurwaarder. Nos no por descarta cu tin un conexion entre DUO, deurwaarder y Corsou”, segun Minister Alcalá-Wallé.
“Mi lo pidi minister di Enseñansa na Hulanda pa haci un investigacion profundo di un posibel liña no integro entre DUO y deurwaarder.”

E ex studiantenan ta den combersacion cu e minister y a entrega rapportnan extenso di e mal comunicacion cu DUO. E minister a manda esakinan hunto cu e carta di urgencia riba 22 juli pa Minister Van Engelshoven na Hulanda. Den e carta e ta haci un yamada pa ‘soluciona e inkietud y tratamento inhusto’.

Reaccion DUO y ministerio
Te ainda e Ministerio Hulandes di Enseñansa, Ciencia, Cultura (OCW) no a contesta riba e carta di Alcalá-Wallé.
E portal a tuma contacto cu e departamento OCW na Hulanda, pero nan ta bisa cu ‘ainda nan ta trahando riba un contesta’ y ‘esaki ta rekeri mas tempo’.

DUO ta comenta cu ‘nan ta haya e preguntanan di e ex-studiantenan di Corsou valido’ pero un contesta riba nan ‘dificil awor’.

“Nos kier duna e minister e espacio pa contesta prome y no anticipa riba esaki.”
DUO ni OCW kier confirma cu tin un problema grandi na Corsou.

Investigacion di ombudsman Hulandes
E ex studiantenan tambe a acerca e ombudsman na Hulanda, Reinier van Zutphen. E ta indica cu nan ta ricibi ‘mas kehonan contra y señalnan riba DUO di parti di ex studiantenan den exterior’.

“E ex studiantenan kier paga nan debe sinembargo no por. DUO e ora ta tuma medidanan pisa”, e ombudsman Hulandes ta bisa.

E instancia aki a cuminsa investiga DUO su sistema di cobransa di ex studiantenan bibando den exterior. Nan kier warda e resultadonan di e investigacion aki prome di reacciona riba e situacion. “Nos ta spera di publica nos investigacion fin di aña.”