Corsou: Discusion fuerte riba matrimonio homosexual poco poco yegando na dialogo

Un siman despues di e manifestacion contra e posibel yegada di matrimonio entre personanan di mesun sexo na Corsou, ambos grupo ta purbando haya un balans. Pero no ta cla ainda con lo bay procede.

Sonja Berkemeyer a bira famoso riba medionan social pa via di un potret di su persona para dilanti un grupo di mas o menos mil manifestante, su so, ‘como mama’ cu un borchi simpel unda ta skirbi ‘si Dios no a traha homoseksual, lo no ta tin un na mundo’.

“Ora mi a tende e anuncio riba radio cu e manifestacion lo ta tumando luga, mi mester a pensa di biaha riba loke mi a lesa 17 aña pasa: Si Dios no a traha homosexual, no lo tin niun riba mundo.”

Berkemeyer a core bay cas. “Mi tabatin tiki tempo pa traha un borchi chikito cu e texto riba pinta riba dje. Pasobra tabata falta solamente 3 ora prome cu e manifestacion hipocrita a cuminsa.”

“Aki na Corsou nos ta acepta biba hunto, yiunan di otro matrimonio, intimidacion sexual entre hobennan menor di edad, tene relacion sexual pafo di matrimonio, nos gusta adulterio, y cuanto mama soltero nos no tin?”

Su protesta singular ta un alegoria riba e sufrimento di personanan cu ta identifica bou capa LGBT, cual ta inclui su yiu. “Hopi hoben no ta ni tribi conta nan mama tocante nan sexualidad, of nan ta pensa riba suicidio. Como mama esey ta loke ta causa mas dolor.”

Berkemeyer a expresa cu su yiu mester a cambia di scol ‘asina hopi biaha’ mientras cu e ta un hoben sabi. “El a hasta bay psicologo na cierto momento pa via cu e tabatin conflicto interno, cu hopi envolvimento di banda di famia. E manifestantenan no tin ningun idea cuanto sufrimento nan ta trece bou nos sociedad.”

Obispo ta adverti Parlamento; alabes dispuesto pa papia

Varios grupo Cristian mientrastanto ta exigiendo pa Parlamento di Corsou no debati, ni menos vota riba e proyecto di ley pa introduci partnership registra. Pa un di e Parlamentarionan cu a entrega e proyecto di ley conhuntamente, Giselle McWilliam (MAN) y Vice Presidente di Parlamento, nan no por ni pensa na duna oido na tal peticion. ‘Ta tempo pa nos trece derecho igual. Esaki no tin nada relaciona cu un casamento den misa, ta trata derecho civil’, McWilliam a splica.

Sinembargo, organisacion cu ta saca cara pa derecho LGBT Koko, a tuma nota di un carta manda pa Obispo unda nan ta declara cu nan ta habri pa dialoga riba e topico. “E Obispo ta mira homosexualidad como un realidad, parti di Dios su creacion. Maske nan ta contra lanta institucion di matrimonio pa pareha di mesun sexo, Obispo ta haya cu algo manera partnership registra ta un derecho humano.”

Como simbolo pa trece mas dialogo, Obispo di Corsou a haya invitacion di e organisacionnan LGBT pa experiencia Gay Pride. Si Obispo berdad lo bay, lo mester wak na september.