Despues di bastante turbulencia, inclui intervencion di gobierno di Reino, diabierna venidero tin eleccion na Curaçao, atrobe. Atrobe, pasobra apenas na october aña pasa tabatin eleccion tambe, pero e coalicion cu a forma no a wanta mucho tempo. Diripiente e coalicion a resulta sin mayoria den parlamento y e prome ministro demisionario hunto cu gobernador a dicidi cu mester tene eleccion nobo.
Protesta grandi di un mayoria parlamentario, cu a forma mientras cu parlamento tabata demisionario caba, y a pasa pa e ‘arma’ descubri algun aña atras, di e ‘gobierno interino’ cu ta substitui e gobierno demisionario. Pero nan plan pa no tene eleccion mas y keda sinta y sigui goberna no a logra. Reino a interveni y a pone gobernador na cabes di eleccion. Cu esey ta garantisa cu eleccion ta tuma luga pero no a garantisa cu e problemanan politico a yega na un fin.
Pa cuminsa, e gritonan pa independencia a bira mas fuerte atrobe, cu lider di MFK Schotte na cabes. For di su punto di bista e tin rason di ta boga pa independencia, pasobra el a comprende bon cla cu no ta su contrincantenan politico local ta su problema principal, pero mas bien e structura di supervision di Reino, cu pa mayor facilidad e ta identifica como ‘colonial’. Ora e politico aki no ta pena pa busca e limitenan di loke ta legalmente posibel, y hasta mas cu esey, un dado momento ta husticia, y su tras gobierno di Reino ta cay aden pa garantisa orden y siguridad publico.
Ta increibel mira un politico condena na tres aña di prizon pa tuma soborno, cu a entrega tripa di servicio di inteligencia di su pais na hende stranhero desconoci, siendo prome ministro, y awor sospechoso den caso di compra di asiento den parlamento, papia como si fuera e ta e mero inocencia asesina. No cabe duda cu su contrincantenan tampoco ta bon mucha, pero no ta dificil pa imagina kico ta bay pasa si e actual mayoria den Staten logra mantene esaki.
Por a mira den e asunto di InselAir con e mandatarionan aki no tin ningun clase di respet pa otro entidad y a bay negocia como gobierno cu e compania propietario di Avianca na Merca, sin tuma na cuenta e gerencia y curator di e compania mes. Esaki ta ilustra e estilo di ‘caudillo’ cu e lider ta demostra, loke por a mira anteriormente caba den e crimen infame di regala stranhero e informacion sagrado di servicio di inteligencia di su pais. Tambe e sucesonan cu a yega na luz di dia den e caso penal contra e persona den aceptacion di soborno di e capo Italiano Corallo, ta demostra un hamber ilimita pa placa. Tremendo lider pa un pais cu kier ta democratico y civilisa.
Pero e proceso electoral na nos hermana isla ta ilustra mas cos preocupante. Desconfiansa den politico y partido tradicional ta haci cu un sin fin di ciudadano ta cuminsa nan mes proyecto politico, aparentemente pasobra nan no ta confia ningun otro pa forma un organisacion mas amplio y mas fuerte, cu mayor posibilidad di logra yega na representacion den parlamento. Ademas no tin un claridad riba orientacion di tur e mini partidonan aki, no tanto den termino di ideologia, ya cu den henter mundo nos por mira awendia e desaparicion di e separacionnan tradicional entre partido conservador o progresista, di rechts of links, liberal, social democrata, democrata cristian, etc. Pero sikiera mester por tin un minimo di filosofia cu ta indica e prioridadnan cu e partido tin si nan logra yega na goberna, cu ta e meta primordial di tur partido. Di hopi di e partidonan e unico cos cu ta conoci ta cu e lider kier drenta parlamento.
Pa e pueblo votado e situacion aki mester ta hopi confuso, sigur pasobra e contrincantenan cu a goberna pa algun luna te tempran den e aña aki, no ta mustra nada solido tampoco. Unico cos cu sa di nan cu nan ta mustra riba e peligro di yuda trece un delincuente na mando di gobernacion di e isla, pero nan mes ta carece na e momento aki di un figura cu realmente por guia e votadonan den un direccion cu ta sabio y sigur.
Mientras tanto e problemanan di e isla no por warda mas y mester solucion urgente. E guera entre diferente banda criminal a yega na tal extremo, cu nan no ta ni secuestra contrincante mas pa hiba nan mata na luganan aleha. E manera di opera ta di djis yega y cu luho di tiro mata e persona y tur loke por ta den su alrededor.
Economia no ta prospera manera cu tabata spera, cu turismo zwak y un sector financiero cu poco posibilidad di cambia e rumbo negativo, mirando e desaroyonan internacional pa pone cada bes mas trabao pa e paisnan chikito den nos region cu ta gana bastante divisa cu servicio financiero. Desempleo ta halto, specialmente bao di hubentud, cu pa un parti pa varios generacion caba ta nace y lanta meymey di violencia y criminalidad. Den e situacion dificil aki, ningun partido tin e formula magico.
