(CuraçaoChronicle) – E 8 crèchenan subsidia na Corsou ta batiendo alarma. Nan no por cubri nan gasto mas y ta den peliger di cera nan portanan. E crèchenan aki tin tempo ta ricibi e mesun subsidio pa mucha for di Ministerio di Educacion, Ciencia, Cultura y deporte pa casi un decada largo. E cantidad aki, conoci como ‘subject subsidy’, no ta suficiente pa cubri e gastonan cu ta aumentando.
E crèchenan subsidia, incluyendo Krèsh Dede Pikiña na Seru Fortuna y Krèsh mi Kasita EBG na Suffisant, ta ricibi un subsidio mensual di 450 florin pa mucha. E cantidad aki tin casi 10 aña sin cambia, mientras cu e costo di bida ta aumentando y minimum loon a aumenta anualmente. Varios mayor por contribui cu un cantidad chikito so pa motibo cu hopi biaha nan ta studiante, no tin trabao of nan mes ta gana minimum loon.
Recientemente, tur e crèchenan a calcula nan gastonan actual basa riba e gobierno su rekisito pa mantene nan licencia. A keda revela cu cada crèche mester por lo menos 650 florin pa mucha pa por cubri e gastonan mensual. E subsidio actual ta bao di e cantidad aki.
E situacion financiero di e crèchenan aki ta alarmante. Nan no por cumpli cu nan obligacionnan cu e empleadonan, manera provee uniform y compensacion di vakantie. Tambe nan no por paga impuesto, cual por resulta den confiscacion di e propiedad personal di e miembronan di e directiva.
E crèchenan a skirbi varios carta y a haci peticion pa tin un reunion cu e Minister van Heydoorn pa atende nan problemanan y hunto busca un solucion. Den un carta di dia 13 di maart, e minister su oficina a indica cu SOAB lo haci un “estudio tocante eficiencia” pa provee conseho. Sinembargo, ningun di e crèchenan a tende nada for di SOAB te cu awo.
E situacion ta asina critico cu un di e 8 crèche ta den cera su portanan. Esaki lo ta un golpi significante na e mayornan di ingreso abao cu ta depende riba cuido subsidia.
