(CuraçaoChronicle) – Centrum Supermarket a ricibi ordo pa paga aproxiamdamente 21,000 florin na muhe di 66 aña cu a cay y fractura su heup den e supermarket. E incidente en cuestion a tuma luga den november di aña 2018. E señora a trompica cu algun palo cu tabata den un area di e supermarket den proceso di renobacion.
E vloer no tabata cla y a pone palo di plywood pa asina e clientenan por cana riba nan y tin acceso na e productonan. Sinembargo no a pone e plywood adecuadamente, causando cu nan a bira bao e señora cu pia y el a cay.
E muhe aki a busca manera di haya compensacion for di e supermarket pa daño material cu ta yega te na casi 35,000 florin y pa dañonan no material cu balor di 50,000 florin. El a bisa cu e dañonan a ser causa pa motibo cu Centrum Supermarket no a tuma suficiente medida di siguridad pa adverti clientenan di e area peligroso y e necesidad di cana cu cautela.
Segun e hues, e medidanan cu a tuma pa adverti e clientenan tocante e trabao di renobacion a laga hopi di desea. Un borchi pafo di e supermarket indicando cu tin construccion andando y otro borchi unda ta bisa cu por slip na e localidad no ta suficiente.
No tabatin nada pa adverti cu por cay riba e plywood y pa tene cautela. Te hasta den otro areanan di e supermarket por a mira borchinan similar. Segun un reportahe investigativo, mester a cera e area pa preveni cu clientenan usa e area aki. Durante e audiencia, e muhe a splica cu e no por a limpia 2 apartamento cu e ta maneha, causando cu e no por a huur esaki. Tambe tabatin atraso den e construccion di varios studio. Pa causa di su situacion e no por a maneha e construccion.
Hues a otorga e señora casi 11,000 florin den dañonan material y 10,000 florin den dañonan no material. Adicionalmente, e supermarket mester cubri casi 10,000 florin den costonan legal.
