(CuraçaoChronicle/TheDailyHerald) – Corsou, Aruba y Sint Maarten no mester conta cu sosten di likides nobo for di Hulanda tanten cu nan keda nenga di duna nan bendicion na e consensusrijkswet cu amienda pa establecimento di e Organo Caribense pa Reforma y Desaroyo, COHO.

Gobierno di e tres paisnan a para firme despues cu a yega na un acuerdo oficial na december. “Nos a haci acuerdonan y mester cumpli cu esakinan” secretario di Estado Hulanes pa Asuntonan Interno y Relacionnan di Reino, Raymond Knops, a bisa despues di Conseho di Minister di Reino (Rijksministerraad, RMR) ayera, cual a dura hopi mas largo cu usual pero no por a trece e partidonan mas cerca di otro.

Ministernan Plenipotenciario a ricibi e mensahe pa nan gobiernonan cu no tin mas negociacion. “Nos no ta bayendo back den tempo. Nos tin un aña y mey ta papia. Mi kier agilisa cosnan”, Knops a bisa. E impasse ta nifica cu ainda no por presenta e legislacion pa consideracion den e parlamentonan.

Sin un ley di COHO, ta spera e tres pais negociacionnan dificil riba extension di e prestamonan (libre di interes) pa coronavirus – cual te awo ta mas cu 2 biyon florin. Esakinan ta caduca dia 1 di april. Dia 21 di januari ta e proximo Conseho di Minister di Reino. Te cu e dia ey, e cranchi di placa na Den Haag ta bay keda cera.

Conseho di Minister di Reino tambe a pospone un decision riba solicitud di e paisnan Caribense pa permiti pa desvia di e norma di presupuesto balansa prescribi den RFT. Esaki ta afecta tur tres pais cu tin deficitnan grandi den presupuesto di proximo aña pa motibo di pandemia di Covid-19.

Knops a nota cu no tin base legal tanten cu no tin consensusrijkswet. “Hulanda a fia e paisnan alrededor di 1 biyon euro, casi dos biyon florin. Esey ta hopi placa y cu mester ta bon sigura legalmente.” El a defende decision di RMR pa no duna e paisnan permiso na e punto aki pa tin deficit den presupuesto pa proximo aña. “Nos no por permiti e paisnan crea debenan grandi nobo tanten cu nan no cumpli cu acuerdonan.”

Knops a rechasa acusacionnan di e paisnan cu Hulanda tabata cambia e condicionnan unilateralmente. “Nos djis kier pa e paisnan tene nan mes na e acuerdonan cu nos a haci anteriormente. Mi ta kere nos por pidi pa esey. Mi ta compronde cu e medidanan cu mester tuma ta doloroso, pero nos a acorda eseynan.” El a agrega cu ta spera cu pronto por yega na un solucion, pa prosperidad di e islanan y nan pueblo. “P’esey nos ta haci esaki. Esaki no ta un wega of un discusion entre politiconan. Ta bay pa haci cosnan miho, bay dilanti hunto. Nos kier inverti den educacion na Corsou, den sector di Husticia na Sint Maarten, baha e tasa di interes pa prestamonan di Aruba. Nos semper mester pensa riba e pueblo cu tin dificultad, pasobra nan ta beneficia ora nos haci lo corecto. Esey ta nos motivacion, esey ta loke ta conecta nos den Reino.”

Riba potret: Raymond Knops.