Den e fin di siman aki Corsou, cu durante hopi tempo tabata mantene un situacion bastante stabiel pa loke ta cantidad di caso di Covid-19 y tambe cantidad di caso di victima mortal – solamente – te awor – den ultimo simannan a mira e panorama faborable aki cambia completamente.
Diasabra pasa dia 05 di december e isla a yega na 1.683 caso activo (3.011 caso total, di cual 1.328 ta recupera), loke ta mas cu e peak cu Aruba a conoce dia 16 di september, tempo cu a yega na e cantidad di 1.630 caso activo. Den e tempo despues, Aruba a logra haya grip riba e situacion atrobe, resultando den un reduccion gradual te na e 132 casonan activo di dia 6 di december. No tin cifra conoci ainda di Corsou pa e mesun fecha aki.
Mientras tanto, a pesar di e situacion cu ta mustrando mas serio dia pa dia, ainda Corsou ta mantene su Code geel, mescos cu Bonaire y Aruba, cu tin un situacion bastante mas faborable cu esun di Corsou. Biaheronan cu ta drenta Hulanda yegando nan cas no mester bay den cuarentena pa 10 dia, pero mester yena un formulario prome cu nan sali. Na regreso mester entrega un PCR-test negativo cu no ta mas bieu cu 72 ora.
