(CuraçaoChronicle) – Un biaha mas a extende Time Out na Corsou cu dies dia. Prome minister Gilmar Pisas a anuncia esaki durante conferencia di prensa. A ahusta algun medida.
E toque de queda ta na vigor for di dia 28 di januari di 11pm pa 4:30am. “E cambio di toque de queda no ta nifica cu hende cu no tin nada di haci mester subi caya”, Pisas ta adverti. E prome minister ta enfatisa cu polis un biaha mas ta na capacidad maximo y cu ta ehecutando cantidad di chekeo.
Truk’i Pan, teatro y establecimentonan di catering mester cera nan porta pa 10pm. Ta permiti hotelnan pa continua duna servicio na nan huespednan di hotel despues di toque de queda. Ademas, hende por haci sport den grupo atrobe. Un maximo di cincuenta persona por participa den actividadnan deportivo, pero no mag di tin publico rpesente.
Bisti tapaboca ta keda obligatorio den areanan publico. Studiantenan entre 12 y 17 aña di edad ta rekeri pa bisti tapaboca ora nan ta na scol. Na otro lugarnan, ta recomenda fuertemente pa bisti un tapaboca.
“E cifranan ta bayendo den bon direccion, pero e pandemia no a termina y nos mester keda alerta”, Pisas a bisa. “E situacion den hospital ta critico, pero stabiel.” Segun e prome minister, e situacion na Centro Medico Corsou (CMC) mester keda alivia lo mas posible prome cu e isla por habri mas. Hospital awo ta conta cu refuerso di 45 trahador di salud.
