Gerencia di RBC Bank Corsou ta haciendo nan investigacion den colaboracion estrecho cu polis. RBC ta lamenta y desaproba e caso aki, asina Hanneke Stomp a declara. Manera ta conoci, ayera durante oranan di marduga, pa mas o menos mita di cinco Central di Polis a haya informacion cu desconocinan a trata na explota e mashin di placa di RBC Bank na Santa Rosa. Algun tempo pasa a explota e otro mashin di placa, di un otro instituto financiero djis pega eynan.
Vocero di Polis Imro Zwerwer, tambe a sigui splica cu e informacion disponibel ta cu desconocinan a huy den un auto shinishi despues di nan acto. Autoridadnan tuma nota di un auto kima no mucho leu for di e sitio na unda e explosion e mashin di placa di RBC a tuma luga. Polis ta kere cu ta trata di e auto cu e desconocinan a uza pa yega na e sitio. Aparentemente den e auto aki tabatin un cilinder di gas y esey lo a explota tambe. Polis ni RBC no por a bisa cuanto cen ni cuanto lachi cu placa e malhechornan a bay cune. E investigacion ta canando. Foto cortesia Extra.
