Cada aña 74% di atraconan ta cometi pa hobennan di entre 12 pa 25 aña di edad, asina cifranan di e Atracoteam di Cuerpo Policial Corsou (KPC) ta mustra.

E cantidad di hobennan cu ta comete atraconan ta preocupante, pero dicon ta net hoben ta sensibel pa comete e delitonan aki? Segun Viandrelica Narcisio, trahado cerca Corsou su Reclassering pa hobennan, mayoria di hoben cu ta comete atraco tin hopi en comun. Despues di a haci un poco investigacion den e dossiernan di e hobennan cu ta comete e delitonan, e por conclui cu hopi biaha nan ta bin di famianan di ‘hopi problema’. Por ehempel di un famia unda e tata no ta presente na cas, haciendo cu ya caba desde edad jong nan ta comporta nan mes di manera problematico na scol.

Falta di señalamento mas activo
“Na Corsou nos no ta señala e hobennan cu tin riesgo pa cay den criminalidad suficiente. Instancianan no ta traha hunto optimalmente, haciendo cu e tipo di casonan aki ta haya atencion mucho laat.” Asina Thyrza Girigorie, coordinado di e proyecto ‘Project Top C Tur wowo riba bo’, cu meta pa guia hobennan cu a sali di prizon reintegra den sociedad, a bisa.

“Maestronan y docentenan mester haya un training pa por detecta e señalnan aki hopi mas lihe y mester bin un sistema unda por meld ora tin preocupacion pa un mucha”. Girigorie ta haya ademas cu e funcionariopublico di leerplicht lo mester traha di un manera mas proactivo pa busca e hobennan aki tin riesgo di cay for di e sistema.

Atraconan arma ta aumentando
Di banda di husticia tambe tin preocupacion. Clarelli Hato-Willems ta e fiscal tratando casonan di atraco; “E cantidad di atraconan arma riba casnan a aumenta e ultimo aña atrobe segun e ultimo cifranan. Tanto den dia como durante anochi ta atraca casnan, cual por ta hopi biaha masha violento mes. Nos tin tiki chens di haya e atracadonan bek pasobra hopi biaha nan ta sconde nan cara cu mascara.”

Den añanan anterior ya caba por a mira indicacion cu t’e mesun grupo di hoben cu ta sensibel pa cay den criminalidad ta comete atraconan. “Durante tratamento di casonan e grupo di hobennan aki mas tanto ta conta cu nan no tabatin placa y cu nan tabata kier a cumpra cosnan caro manera un telefon nobo. Nan tin mester di placa lihe e ora ey, pero nan no tin entrada. Nan ta scoge e ora ey pa e manera mas facil pa nan yega na placa y ta bay over na atraca un cas of por ehempel un supermercado Chines. Loke nan ta horta hopi biaha no ta yega na cantidad super halto, pero e daño, tanto fisico como emocional ta hopi halto mes”. Esaki segun fiscal Hato-Willems.

Narcisio mientrastanto kiermen cu e edad di e hobennan cu ta bay den criminalidad ta cayendo cada aña mas: asina e por menciona cu awendia si ta cuminsa monitor muchanan di 7 aña bo por ta trempan den señala problemanan cu por causa cu e ta bay den e direccion fout. Pero e tin miedo cu e problemanan lo por bini mas tempran ainda. “Si nos por cuminsa haya sa cua famianan ta afecta pa problema lo mas tempran cu ta posibel pa asina preveni cu e muchanan ta bay busca direccion di criminalidad, nos lo ta un stap vooruit.”