Autoridad na Corsou a haye cu un situacion di persecusion cu a termina den forma fatal pa dos persona. Durante oranan di marduga a tuma nota cu un boto ‘go fast’ a yega costa di e isla na un forma sospechoso. Polis a drenta accion di biaha den e area pa wak kico lo por ta pasando.
Na yega di polis, a tuma nota di un auto SUV color preto cu 8 persona aden di aspecto latino. A duna orden pa e vehiculo para pero a ignora e mandato di polis. Un persecusion a start cual a termina den un accident den e area di St. Joris despues cu e auto a bay dal den cura di un misa. Aparentemente ta trata aki di personanan procedente di Venezuela.
Segun e prome informacionnan cu nos a ricibi, polis lo a los tiro den direccion di e auto cual posiblemente di un personanan a keda alcansa pa e bala. Segun varios media na Corsou, lo a haya maleta, droga y mas cu 20 arma di candela cu tabata den poder di e personanan aki. Dos persona a fayece na e sitio y tin un persona bastante grave. Tambe tin 3 otro persona herida.
E caso aki ta bou di investigacion ainda y mas informacion (oficial) lo sigui den nos edicion di corant di mayan.
