Coronavirus un menasa pa bida di hende y economia mundial; Min Dangui Oduber: Palabra ‘prepara’ contra coronavirus ta ‘subhetivo’

Un microorganismo asina chikito cu bo no por wak’e mes, ta esun cu a bira un menasa pa bida di hende. Pero tambe un menasa contagioso pa economia mundial. Ta trata di e coronavirus of Covid-19.

E ta un virus cu mayoria di caso ta ocasiona un malesa leve, pero cu por resulta fatal pa esunnan mas vulnerabel, hendenan grandi y pashentnan cronico. Un virus cu a afecta e bolsa di balor mas importante di mundo, manera Dow Jones, cu a sufri un crisis financiero no bisto for di 2008. Te hasta prijs di petroleo a cay casi un 17%.

Aruba y coronavirus

Covid-19 ta un virus como tur otro virusnan. Pero e diferencia ta cu e ta un virus super contagioso, locual ta produci cantidad di persona infecta lihe. Esaki ta ocasiona un impacto den cualkier sistema di sanidad te hasta collapse. Na Aruba no a confirma niun caso di coronavirus… ainda.

Sinembargo gobierno a eleva e nivel na esun di ‘crisis’ pa sigura lo miho posibel pa nos tin medio di accesibilidad di fondonan pa atende cu cualkier crisis. Nan a anuncia un centro di diagnostico cu ta bira e localidad pa atende e prome caso coronavirus, unabes cu e ta wordo conoci oficialmente. Tambe nan a anuncia un call center cu ta accesibel 24 ora pa dia.

Den caso cu un persona ta haya necesario pa descarta cualkier sospecha di e virus, bo por yama libremente na 2800101. Tur esakinan premirando cu cada bes mas e virus aki ta mas cerca di nos. Gobierno ta conseha henter comunidad pa no bay den panico. Pero tambe nan a pidi pa niun hende, y specialmente prensa, no contribui pa crea un ambiente di panico den nos comunidad.

Minister di Salud, Dangui Oduber, a reacciona contra cualkier publicacion cu ta indica cu Aruba no ta prepara ainda pa atende cu e coronavirus. E ta haya cu e palabra prepara ta hopi ‘subhetivo’. Ya cu actualmente nos tin entre otro e test pa detecta e virus y tambe cambernan di isolacion. E mandatario a declara cu Aruba ta cumpliendo cu e regulacion internacional di salud. Ademas nos pais ta hayando sosten y cooperacion di Reino pa yuda nos den cualkier reto relaciona cu e virus aki.

El a bisa cu for di comienso di luna di januari ya caba nos sistema di salud a cuminsa prepara, pasobra nan sa caba cu den cualkier momento e virus aki por yega nos isla eventualmente pa medio di un turista. “Logicamente salud di nos ciudadanonan ta bin nan prome luga,” el a bisa. E ta haya cu tur e preparacionnan aki ta asina importante pa garantisa cu nos por maneha e situacion, unabes cu e ta presenta.

Ya caba varios casonan sospechoso relaciona cu e virus aki a pasa test, y nan a resulta negativo, kiermen no a wordo confirma. Asina e mesun minister di Salubridad Publico, Dangui Oduber, a yega di declara durante un conferencia di prensa, dialuna ultimo.

Nan ta monitor constantemente cada ora, pero e mandatario no a descarta cu den cualkier momento un caso importa di Covid-19 lo por presenta na Aruba. El a compromete su mes cu unabes esaki lo sosode, nos comunidad lo wordo informa debidamente di dje. “No tin motibo pa keda sin duna informacion y nos ta keda haci esey tambe,” el a bisa.

Igualmente e hoben mandatario bistiendo su pechi di minister di Turismo a expresa su preocupacion riba e impacto cu coronavirus lo por tin pa nos principal y practicamente unico pilar economico. El a laga sa cu ya cantidad di cancelacion ta tumando luga den nos sector hotelero.

Un factor cu ta faborece nos, y cu tin biaha nos ta keha di dje, ta temperatura halto. E virus super contagioso aki no ta biba asina largo bao e temperatura cu nos ta bida aden den nos region Caribense.

Panorama global

Antes informacion internacional tabata relata victimanan fatal y cifranan di personanan contagia na China so. Awor nan ta referi na otro paisnan, tanto na Asia, Europa, Nort America, Caribe y Sur America, pues e ta na porta pa declara un pandemia pa Organisacion Mundial di Salud (WHO).

Actualmente e situacionnan ta birando proporcionalmente robes. Mientras cu na China -unda e virus a wordo descubri na Wuhan- e cantidad di casonan a cuminsa baha. Di otro banda e cifranan di casonan registra den varios continente a cuminsa subi keto bay.

Ta asina cu na China alrededor di 80.750 persona a resulta contagia cu e virus Covid-19. E hecho aki a conduci cu e gobierno Chino a dicidi di bin cu medidanan pisa y stricto nunca antes bisto pa controla cu e virus aki lo por sigui plama den su poblacion, entre nan cuarentena masivo. E resultado ta bisto! Dialuna WHO a señala cu un 70% di e personanan infecta cu e nobo coronavirus na China a bira bon. Ademas e pais aki ta mustra cu nan ta bin controlando su epidemia.

Mientras cu e virus aki a yega caba na mas cu 100 pais di varios continente, caminda e cifra di personanan infecta ta surpasa ampliamente mas cu 100 mil. E presencia di e virus aki a bira un reto pa nan sistemanan di salud, pero tambe un menasa pa esunnan menos desaroya. Actualmente 60 miyon di Italiano ta regarda den nan pais y den nan cas. Bon Dia Aruba a tuma contacto cu un ciudadano na Florencia, ciudad situa parti nort di Italia, kende a prefera di keda anonimo. El a relata loke nan ta pasando aden actualmente. El a bisa cu coronavirus ta algo cu nos tur mester tuma na serio.

E ta remarca riba esaki, ya cu na Italia a pesar cu e expertonan tabata suplica pa tene cuenta cu tur medida di prevencion, y abstene di biaha di un ciudad pa otro, nan no a wordo tuma na serio, y awor nos por mira e consecuencianan.

For di dialuna henter teritorio Italiano a wordo declara ‘zona cora.’ Esaki kiermen cu e poblacion mester keda den nan cas. No tin scol, universidad, teatro, discoteca, gym y niun tipo di actividad deportivo. E restaurantnan mester cera pa 6’or atardi (18:00). Tur e medidanan aki ta dirigi pa protege nan poblacion y muy specialmente e hendenan grandi y tambe e pashentnan cu malesanan cronico.

“E unico cos cu nos por haci ta keda na cas pa evita cu nos por resulta contagia cu e virus of loke ta pio, pa evita cu e virus no plama mas…” el a bisa. E ta reconoce cu e medida aki ta un sacrificio grandi, pasobra nan ta sinti cu nan no tin libertad. Pero esaki ta e medidanan mas prudente y adecua pa yuda alivia e presion riba nan sistema di salud y tambe nan capacidad di carga den nan hospitalnan.

Mientras cu tin tratamento cu ta dunando resultado positivo, fundacion Bill y Melinda Gates y otro dos organisacion di caridad a priminti di entrega te hasta 125 miyon dollar pa acelera e desaroyo di tratamento contra coronavirus.