Aruba tin actualmente dos problema. Un di nan ta manehando bastante bon, esey ta e crisis di coronavirus. Te awor nos ta manteniendo un record bastante stabiel, sin ningun morto pa lamenta y cu un score basta agresivo pa loke ta prueba haci. Na inicio tabatin cierto critica, acerta, riba con tabata maneha asunto manera e control riba e personanan cu a haya aviso na entrada na e pais cu nan mester a bay den cuarentena, y no tabata haya debido control riba con nan ta comporta nan mes durante e dos simannan ey. Esey a mehora, ta nos impresion y ta spera cu nos lo sigui den mesun direccion. Naturalmente despues nos ta haya otro decision pa tuma, cu tambe ta trece su desafio, ora mester dicidi na ki momento y con nos ta cuminsa habri porta atrobe.

Otro crisis cu nos ta haya nos aden a consecuencia di e coronavirus, ta hopi mas grave y lo tuma hopi mas tempo pa resolve. No ta solamente e cantidad grandi di persona cu ta sin trabao, pero na e momento aki caba ta cuminsa bira mas cla cu e mal soño aki no ta bay laga nos dentro di un par di luna. Nos lo mester prepara pa un aña completo cu ta bay ta hopi dificil, mientras por spera pa mas tempran un recuperacion otro aña. Si nos ta acepta esey como e scenario mas probable, anto nos lo mester prepara pa loke ta bin. Y ta aki ta unda nos tin nos dudanan si nos ta haciendo loke nos mester haci.

Por ehemplo e manera cu ta atende e problema di miles di trahador desemplea, cu hopi mas cu por perde nan trabao den e proximo lunanan si e empresa unda nan ta traha no logra mantene cabez riba awa. Loke nos por a mira cu e mandatario encarga cu Labor y Asunto Social a sali dilanti cu un programa pa atende desempleado individual na prome lugar. No ta cuestiona su empeño pero si e metodo aplica. A core pone enfasis riba e persona individual cu por haya ayudo, y a pone e asunto di e empresario na segundo plano. Esaki por resulta un eror costoso. Kico ta pasando?

Nos tin miles di persona cu ta na merced di haya un compensacion pa nan sobrevivi, mientras cu esaki no tin un relacion mas cu nan dunador di trabao. Si a cuminsa di biaha pa atende e asunto cu e empresanan, marando apoyo na e empresa na e requisito, te unda por, di tene hende riba nan payroll, lo nos ta gastando placa tambe, pero nos lo tin mas hende na trabao, pues mas placa lo por a bay pa gobierno den forma di impuesto y prima. Esaki lo a haci e posicion di e fondonan di seguro social y medico mas fuerte tambe, reduciendo e riesgo cu nos lo mester bay aporta pisa, cu placa fia, pa mantene nan riba pia. En corto, nos a crea un caso unda, pa haci un comparacion, nos a duna piscador desemplea pisca pa come, pero nos no a trata di tene e boto operacional pa nan por bay pisca.

Pero e storia no a caba ey. Despues cu ya miles, cerca di 10.000, a perde empleo caba, nos mester atende di tur manera e empresanan cu ta riba pia ainda, pero ta tambalea. Nos sa cu gobierno ta den consulta cu e gremionan empresarial pa elabora un plan con pa apoya sector priva den e situacion actual. Nos no ta duda tampoco di e bon intencion di tur hende, pero tin cierto asunto cu nos mester atende mihor. Por ehemplo: awor cu tin miles di hende riba caya caba, y nos nunca a tende di accion contra e dunadornan di trabao cu a probecha di e oportunidad di e promesa di 950 florin pa manda nan empleado caya, awor gobierno mester bay deal cu esnan cu a haci un esfuerzo sikiera pa mantene nan empleadonan riba payroll. Y kico ta e reaccion populista? “Bo no por kita niun hende di trabao; nos no ta acepta peticion pa retiro.” Esaki ta simplemente ridiculo, pasobra ki tempo e departamento concerni a yega di haci algo pa trahador cu ta perde trabao, den tempo bon, y awor cu bo a laga casi diesmil bay caya caba sin comenta, awor bo ta bay ‘play tough’ cu esnan cu sikiera tin e decencia ainda di cana e caminda legal y pidi permiso pa retiro? Ki tipo di maneho esaki ta? Acaso e director di Labor no por mara su carson bon y bisa e ministro cu ta e como director ta dicidi riba peticion di retiro, despues di e proceso di consulta manera ley ta prescribi. Ley ta ley ainda.

Mas tristo ta cu no ta mira ningun intervencion di otro mandatarionan cu mester sa mihor cu laga nan colega riba e campaña populista aki, cu ta haci mas daño cu bon. Nos kier mira fin di luna con leu ta cu procesa e peticionnan pa ayudo y ken ta haya y ken no. No ta dificil pa imagina e bochorno cu lo tin, si pa fin di luna ainda no a tramita mas cu parti di e miles di peticionnan ey.