Genevedra Cornelia Marchena ta un hoben di 18 aña di edad cu ta participa den e deporte di gimnasia artistico desde un edad jong. E ta conta Bon Dia Aruba su trayecto den gimnasia artistico y con esaki a yud’e den diferente aspecto di su bida.

Genevedra, miho conoci como Cornelia pa su amistadnan, a conta cu su infancia tabata uno yena cu experiencianan cu a yud’e converti den un hoben cu disciplina, dedicacion, balentia y independencia, un hoben cu semper ta haci su maximo esfuerso y “go the extra mile” si esey kiermen cu e lo por logra algo miho den bida.

Cornelia a cuminsa practica gimnasia artistico tempo cu e tabata bishitando scol basico. “Mi a wak diferente di mi amiganan di [scol basico] bay den e tempo ey, y m’a haya mas y mas interes. Asina mi a bay un dia pa wak y experiencia un les y despues mi a sigui bay y sigui gusta y haya gimnasia artistico e deporte pa mi,” el a splica.

El a sigui conta cu su motivacion mas grandi pa avansa y sali pa dilanti den e deporte di gimnasia artistico tabata su mesun persona, pasobra semper e tabatin e gana di sigui mehora y experiencia diferente cos nobo pa su mes.

Cornelia a cuminsa su trayecto di gimnasia artistico y a compromete su mes completamente cu e deporte, te cu el a yega na e final di competencia. El a yega di participa den diferente competencia tanto ariba nivel nacional como internacional, y esaki a yudele den diferente area. “Mi a yega di bay diferente competencia cu a habri mi conocemento no solamente den mi deporte, pero tambe di otro lugar nan manera Oklahoma, Cali y Costa Rica,” el a expresa.

Hopi ta usa deporte como un vehiculo tambe pa crece y mehora den aspectonan di bida personal. Cornelia ta sigura cu practica gimnasia artistico a yudele ta mas consciente di su salud y scol. El a indica cu e deporte motiv’e pa traha mas duro pa su educacion y deporte pa por sobresali den tur cos. “E la yuda mi compronde y realisa cu tur cos mester ta den balans pa mi por haci tur cos lo miho cu mi por.”

Aworaki Cornelia ta dunando les di gimnasia artistico. Compara cu atleta di competencia, el a splica cu e ta basta diferente, pero toch hopi parecido. E ta wak e como un oportunidad pa yuda e futuro atletanan usando su propio experiencia como atleta cu a yega di competi den varios campeonato.

“Asina mi por comparti y duna first hand experience y ayudo na e mucha nan pa nan tambe por haci un bon papel, cual na final di dia ta duna mi e mesun sentimento di orguyo y satisfaccion cu ora ami gana of competi,” el a enfatisa.

Apart di ta activo den e deporte di gimnasia artistico, Cornelia ta forma parti di un grupo di baile tambe, algo diferente p’e. “Mi a cuminsa baila door cu un bisiña amiga di mi tambe ta baila cu e grupo y mi a bay purba y mi a gusta,” el a splica.