Dialuna awor dia 12 di augustus ta wordo conmemora Dia Internacional di Hubentud, mientras cu diahuebs un aña escolar nobo 2019-20 ta cuminsa.

E aña aki e tema di Dia Internacional di Hubentud ta: Transformando educacion. Y e ta coincidi cu e cambionan cu gobierno a introduci pa medio di minister di Enseñansa, Rudy Lampe y su Plan Enseñansa Nacional (PEN) y Scol Multilingual. Con e cambio aki lo por impacto riba nan, y cual lo ta e miho manera pa esaki lo por sosode, sin cu nan lo bira algo traumatico pa nos muchanan y hobennan?

Den e caso aki, Corina Linssen di Fundacion Tienda di Educacion a bin cu informacion valioso riba e cambio di scol, specialmente ora cu nan ta cuminsa scol secundario. Nan ta den un edad cu no solamente nan lo ta den un cambio fisico sino mental cu ta trece cierto retonan cu mester di su atencion.

Tambe tin e aspecto cu e muchanan entre 12 bay ariba ta den pleno pubertad ta bay cambia di scol. Por ta nan ta bay scol secundario loke ta nifica pa nan un reto grandi tambe. Nan ta bay sinti entre otro peer pressure, nan ta bay competi cu otro y nan ta bay experimenta cu alcohol of marihuana, etc… Tur esaki por ta na caminda na momento cu bo yiu ta bira adolescente, segun Linssen.

El a indica cu cada vak tin su mesun docente den scol secundario y esaki ta un cambio pa e muchanan di scol basico ta bay sinti. Ya cu cada biaha nan ta bay topa cu un docente diferente cu ta duna les na otro manera.

Esaki ta demanda hopi di dje y ta importante como mayor siña bo yiu plania pa nan por cumpli cu nan huiswerk debidamente. E mester bira casi un ‘automatismo’ pa asina e mucha por deal cu cierto responsabilidad di scol.

Tambe ta bon pa e siña comunica cu e diferente docente y lag’e cu e por atende cu nan tambe. Tambe mirando cu ta wordo implementa e sistema di scol multilingual e ta conseha pa prepara bo yiu prome cu e ta yega scol, vooral scol secundario, specialmente cu e uzo di idiomanan, manera Hulandes.

Linssen a bisa cu hopi mayor ta pensa cu ora nan yiu ta drenta den e periodo di pubertad y tambe den adolescencia, ya caba e ta independiente y no mester di mucho ayudo, ya cu e por haci tur cos ariba su mes. Pero e pensamento aki no ta uno full corecto, ya cu e fase di pubertad y adolescencia ta trece asina hopi confusion y cambionan cu nan mester haya e sosten di nan mayornan constantemente.

Despues den un edad di 17 bay ariba e hoben ta pasa den un cambio grandi. E ta e fase caminda e ta dicidi pa sigui su estudio superior. Of algun di nan ta opta pa drenta mercado laboral. Pero ainda nan ta hoben y den fase di adolescencia, kiermen ainda e hoben no ta full desaroya, y por ta e ta sinti intrankilidad of insiguridad.

“Nan ta bira mas independiente, pero ainda nan no por wak consecuencianan di nan mes comportacion of di nan mes escogencia,” el a bisa. Linssen a splica cu nos cerebro ta desaroya te cu 25 aña, kiermen e pida di rason cu ta esun mas importante pa sa kico e comportacion di e hoben por trece como consecuencia pe, ta desaroya te 25 aña.