Siman pasa un grupo di nos studiantenan a bandona Aruba pa sigui nan estudio superior na Hulanda. E ta nifica un cambio grandi pa e hoben su sistema di bida, pero con un mayor por yuda su yiu for di Aruba den e proceso aki?
Corina Linssen di fundacion Tienda di Educacion (161) a conseha pa e mayornan keda cu e contacto cu su yiu via telefon. Unabes cu bo yiu ta cuminsa adapta na e cambio aki y bira mas trankil, bo por yam’e por lo menos un biaha pa siman. Esaki a pesar di e creencia of sugerencia cu generalmente nos ta scucha cu, mester duna e hobennan aki nan espacio y no yama nan regularmente.
El a splica cu ora e hoben ta bay afo, esaki ta un periodo hopi dificil pa tur dos banda, tanto pa e mayornan como pa e hoben. Pero pa supera esaki e combersacion ta keda importante. E echo cu awendia ta resulta mas facil mantene comunicacion cu otro, danki na e facilidadnan cu ta brinda e smartphone, ta bon pa e mayornan keda den contacto cu su yiu. Pero esaki mester sosode di un manera normal of neutral. No di un manera cu tur ora e mayor ta yama su yiu pa bis’e: “Ay mi tin falta di bo!” Ya cu esaki no ta yuda e hoben na nada. Sino cu e ta trece cerca dje e pensamento cu e tata of e mama ta full desespera cu su ausencia.
E mayor mester keda basta neutral pa medio di un combersacion ameno y agradabel. Ora bo ta mantene un combersacion riba cualkier topico cu bo yiu cu a bay Hulanda of otro pais, esaki ta permiti cu abo como mayor y bo yiu tambe ta sinti cu nan relacion ta sigui fuerte. Tambe bo por percibi ora cu algo no ta bayendo bon cune, caminda bo tin chens pa papia cune tambe. Igualmente bo yiu tin e confiansa di laga bo sa ora cu e ta confronta cualkier problema y te hasta e lo pidi bo conseho.
