Premier Mike Eman a laga sa cu actualmente nan a desaroya henter un vision riba uzo di bicicleta riba nos isla manera ta tuma luga na Hulanda. P’esey gobierno actualmente ta den pleno desaroyo di un fietspad bou e guia di expertonan di Den Haag . Segun e mandatario, tin un area di 10 kilometer di area ta wordo destina pa e bicicleta por core.
Pa introduci esaki e mandatario no a papia riba cambio di ley di trafico sino mas bien riba un maneho pa conscientisa masivamente nos hende via medionan di comunicacion y social media pa haci nos automobilista mas consciente di tene cuenta cu e coredonan di bicicleta. Pero tambe pa e coredonan di bicicleta ta consciente unda eventualmente nan lo por confronta peligernan, specialmente riba cierto crusada masha cera.
Nan a studia e impacto cu e area di linear park tabatin pa nos isla. Mirando e canamento y coremento cu ta tumando luga riba linear park, pero tambe di otro banda nan ta consciente cu na momento cu ta bay bin un fietspad lo bira mas atractivo pa haci uzo di e area ey, ya cu bo no ta core e peliger di auto. Tambe e ta haya cu lo tin hende cu ta bay cu nan bicicleta te e fietspad.
Considerando e facilidad aki, nan kier pa nos automobilistanan ta mas consciente di esunnan cu ta core riba bicicleta. Ademas mas hende ta haciendo uzo di bicicleta electrico como medio di transporte y e echo cu nan lo dispone di un fietspad di 10 km lo haci ainda mas atractivo pa nan move.
Esaki ta trece cu ne algun reto riba parti di siguridad y pa e motibo ey a bin cu expertonan di Den Haag na Aruba, ya cu nan tin hopi experiencia con nan por conscientisa nos automobilistanan di nan derecho y proteccion di esunnan cu ta core riba bicicleta.
