No tabatin mester di holoshi of cinta pa midi e campeon di mas grandi den e prome anochi di campeonato mundial di track and field. E medaya di oro pa espiritu deportivo a bay pa Braima Suncar Dabo, e coredo di 5km di Guinea-Bissau kende a stop su propio carera pa yuda su competido di Aruba yega final ayera nochi.
Dabo a sostene un Jonathan Busby exhausto, y hunto nan a lucha rond e ultimo birada y riba e linea final, cu un gran aplauso, maske e otro coredonan a crusa 5 minuut antes. Busby, di Aruba, a collapse riba e pista y a wordo poni riba un rolstoel pa staf medico.
“Cualkier atleta den e situacion aki lo a haci mescos”, Dabo a bisa mediante un traductor. “Tabata algo normal, pa yuda un persona di otro pais, pasobra e tambe tabata representando su pais”. Lo unico cu Busby a bisa tabata ‘danki’, Dabo a agrega.
Tanto Busby como Dabo tabata e unico atletanan di nan pais na e campeonato mundial. Ambos a competi bou invitacion special cu ta permiti paisnan sin programanan fuerte di track y field manda un atleta na e campeonato, hasta si e atleta en cuestion no a cumpli cu standard di cualificacion.
Dabo a cay hopi atras, y su meta no tabata pa cualifica pa e final, sino djis pa logra un best personal. Tempo di Dabo – casi cinco minuut mas cu e lider – oficialmente a keda graba como un best personal, hasta despues di a stop pa yuda Busby. Pero Dabo a bisa cu e no tabata mucho mas lihe den pasado.
Oficialmente, Busby a keda descualifica. Sinembargo, e publico a explota den aplauso ora e y Dabo a crusa e linea final.
