Diaranson ultimo den nos edicion di Bon Dia Aruba a sali un articulo tocante Departamento di Integracion, Maneho, Admision y Stranheria (DIMAS), cu tabatin un par di fout di tipeo y ta importante pa aclaria cierto informacion.
Tin diferente compania den sector comercial cu tin e necesidad di haya empleado, manera PR di DIMAS, Marilyn Wout a bisa den un conferencia di prensa diamars ultimo. El a sigura cu companianan di sector Horeca cu no a ricibi e curso di “Onboarding Session’ ainda por inscribi via e formulario cu ta disponibel via e facebook page di DIMAS, caminda e siguiente training ta bay cuminsa na april.
E training aki ta encera kico e maneho nobo di permiso ta implica, kico ta e permiso cu personanan por aplica p’e, documentonan y tambe con por traha cu e portal. “E portal tin diferente beneficionan tanto pa e persona di recurso humano cu ta introduci e permiso como tambe pa e cliente cu ta esun cu ta e titular di e permiso aki.” Wout a bisa.
E tempo cu nan tin pa procesa cada permiso ta entre 6 pa 10 siman, pero si ta haci e peticion usando e portal esey ta nifica cu e permiso por bay mas lihe, manera Wout a afirma. Den futuro, e solicitante di permiso of e compania lo por paga e permiso via e portal di pago mes, pero nan ta trahando riba esey, no ta na vigor ainda.
Tambe den e peticionnan cu nan tin den proceso nan ta depende di otro instancianan como Departamento di Impuesto, cu a wordo menciona caba, pa asina wak si e persona ta cumpli cu e inkomensnorm. Ta check si e garante tin por lo menos 2.040 florin pa luna pa e por para como garante pa un peticion di permiso di reunificacion familiar; si ta trata di busca un personal domestico, e solicitante mester prueba cu e tin 50.000 florin pa aña.
